TURA: Garo Hills Autonomous District Council (GHADC)-ko chalaianio dingtang dingtang neng·nikanirangko chagrongna nangengani gimin aro GHADC-o kam ka·enggiparangba ja 43-ni dormaharangko man·kujae neng·nikanirangko chagrongna nangtokengani gimin Robibar salo, Tura-o donggipa dingtang dingtang Mondolirang, apsan tom·chimongenba jinma bi·chakanirangko dakangaha.
Jinma bi·ani program-ko Tura-ni District Auditorium-o ong·ataha aro ia program-ko ong·atanio dingtang dingtang mondolini dilgiparang, MLA-rang, MDC-rang aro songsalko dilenggiparangba bak ra·angtokaha.
Tom·ani a·bachengao, Tura Don Bosco College-ni Principal Rev Fr Januarius S Sangma, rimchaksoani kattarangko aganangengon, ia salo dingtangmancha A·chik a·songna pattigimin district council-ko tangchaatpiltaina gita Nokgipa Isolo apsan bi·rimna ia tom·aniko ong·ataha ine tom·anio bak ra·giparangna agan-talate on·angaha.
Tribal-rangko chel·chakna gita Indian Constitution-ni Sixth Schedule-ko on·ani bidingo talate on·angskaengon, iana dingtangmancha Nokgipa Isolko mittelpile, GHADC-ko tange rakkina aro A·chik a·songo chadamberangni pekatgipa samrangko jakkalanichi ong·sianganiko champengchina Nokgipa Isolo apsan bi·na ineba Rev Sangma, ku·monganiko on·angaha.
Ia tom·anio, Hawakhana Baptist Mondolini Pamong, Rev Frithing D Sangma-ba Isolni kattarang baksana A·chik a·songo ong·enggipa obostarangni gimin janapangengon, GHADC-o kam ka·enggipa manderang, ja 43-ni dormaharangko man·kujae chaktopilgijagipa duk mikchirangko chakna nangtokenga ine ia neng·nikanirangko namatchina Nokgipa Isolna pakwatna aro jinma ku·cholsan bi·na ine ku·monganiko on·angaha.
Ia jinma tom·bimonganiko ong·atanio dingtangmancha A·chik a·songna aro GHADC-na jinma ja·sku dipane Isolo bi·angtokaha.
Ia tom·bimonganio, Jumang Nokkap Centre-oni Namsmi Momin aro Tura Church Choir-ba nambee Isolna ring·mittelangaha.
Ia jinma tom·e bi·ani program-o Opposition dolni dilgipa Mukul Sangma, A·chik Baptist Dal·gipa Krima (ABDK)-ni padot Rev Dilseng M Sangma, Seventh Day Adventist Church-ni Rev Barthon G Momin, UCA-ni Rev Manseng A Momin aro dingtang dingtang mondolini membor-rangba dongpae bak ra·angtokaha.
