Niam gri napsrukaniko champengna ta·rake STF-ko songchina NESO, GSU dabia

TURA: Garo Hills-ona gipin biaprangoni napsrukbae songdong a·chaenggipa manderangko sandie, biaptangtangona watatpilna man·na gita ma·mong sorkarini ge·etgimin gita Garo Hills-oba ta·raken Special Task Force (STF)-ko songchina Garo Students Union (GSU) aro North East Students Union (NESO), a·dok sorkario dabiangaha.
Sonibar salo, GSU aro NESO dolni membor-rang, South West Garo Hills a·jani simarangko nina re·angaha aro iani bidingo South West Garo Hills a·jani Deputy Commissioner-koba gronge agangrikangjolaha.
South West Garo Hills a·jani simarangko nina re·angon, Sixth Schedule-ni ning·o ga·akgipa bang·bata biaprangon Bangladesh aro Assam-oni manderang napsrukbae songdong a·chatokaha ine GSU aro NESO-ni membor-rang nikna man·aha.
GSU CEC-ni president Tengsak G Momin-ni parakatani gitade, South West Garo Hills a·jani Deputy Commissioner-ko gronge agangrikon, ia biaprango napsrukbae songdongenggipa manderangni bidingo ua an·tangba ku·rachakaha aro napsrukbae songdongenggipa manderangni bidingo u·iatanirangko nangkuengoba uamang niam gri songdongenggipa manderangko sandienga ine parakataha.
“Ramarangosan niam gri napsrukbaenggiparangko nitimaianichide maming namgni dongjawa maina niam gri napsrukbaenggipa manderangara apsan jatan ong·ani gimin ia jolrango songdongenggipa manderang, uamangko noktangtangosa dongnutokenga. Mitam biaprangode songni Nokmarangan, ia manderangko chengoni songdongbagiparang ine lekkarangko on·e dakchakenga,” ine NESO aro GSU-ni dilgiparang aganaha.
Niam gri napsrukbae songdong a·chaenggipa manderangko sandina gita a·songni pilak a·dokrangon STF-rangko songchina ma·mong sorkari ge·etaniko on·manaha ine janapatengon, Meghalaya a·doko STF-ko songna gita a·dok sorkari ge·etaniko on·manahama ine GSU-ni president sing·doataha.
“Meghalaya sorkari ia kamko gisiko nange jako ra·jaenga. Khasi Hills-o jekai KSU dol, sandirokanirangko dakenga, apsan daken South West Garo Hills a·jao GSU Western Zone South-ni membor-rang, niam gri napsrukbae songdongenggipa manderangko sandina jotton ka·enga. Mikkangchiba chinga niam gri songdongenggipa manderangko am·sandiangkugen aro sorkarikoba rake kam ka·china didiangkugen,” ine Momin parakataha.
Apsan daken NESO-ni spokesperson Manseng A Sangma-ba, Garo Hills-o niam gri napsrukbae songdong a·chaenggipa manderangko sandina aro songtangtangona watatpilna gita STF-ko songna nangenga ine raken dabiangaha.
“Ma·mong sorkarini ge·etgimin gita STF-ko ta·raken songchina anga a·dok sorkariko didienga. Niam gri songdong a·chaenggipa manderangko sandienba, songtangtangona watatpilna nangchongmota,” ine ua aganaha.