TURA: West Garo Hills a·jani Selsella jolrango Jio network-ko name man·tokjaengani a·sel jolo songdongenggipa manderang, mongsongbate poraienggipa chatro chatrirang neng·nikanirangko chagrongna nangtokenga ine Selsella jolo donggipa dingtang dingtang dolrangni nangrime bikotgipa All Selsella NGOs Alliance (ASNA) parakatenba, Selsella jolrango Jio network-ko nambate on·china aro 5G service-ko a·bachengate on·china Tura-o donggipa Reliance Jio Telecom Office-ni manager-na sedoataha.
ASNA-ni parakatani gitade, batanggimin jarangonin Selsella jolrango Jio mobile network-ko name man·jaengani a·sel internet-rang ka·sine, office-rango kam ka·giparangm bading chiwale cha·giparang, game ge·e cha·giparang aro chatro chatrirangba neng·nikanirangko chagrongna nangtokengachim.
“India a·song gimikon Reliance Jio company, namgipa network-ko on·e manderangni kamrangko ka·anio dakchakanirangko on·enga indiba Selsella jolrango Jio network-ko name man·jaengani a·sel jolo songdongenggipa manderang dingtang dingtang kamrangko ka·anio aro mongsongbate internet gita lekka poraniko ra·na nangenggipa chatro chatrirang neng·nikanirangko chagrongna nangtokenga,” ine ASNA-ni dilgiparang parakataha.
Indake ong·engon, Selsella jolo dingtang dingtang kamrangko ka·enggipa manderang aro chatro chatrirang nambate skie ra·na man·na gita Selsella jolo 5G network-ko a·bachengatchina ASNA didiatenba, ia jolrango 5G network-ko a·bachengatanichi, chatro chatrirangni dingtang dingtang porikkarangko seanio, game ge·e cha·giparangni kamrango, bading chiwale cha·enggiparangni kamrango aro pilak kamrangon manderang altubatatako man·gen ine parakataha.
Ia All Selsella NGOs Alliance-o Selsella-ni GSU, FKJGP, ADE, ASWA, NGCO, ANYO, GSMC aro ACHIK dolrang bakrimengachim ine nikna man·a.