Gisik ra·na krabegipa ja·ku de·ani ine Chief Minister a·kanga
SHILLONG: Ia 2025 bilsini November ja dipet Garo Hills Autonomous District Council (GHADC)-o kam ka·enggipa manderangna a·dok sorkari, dormahako on·na tik ka·angaha.
GHADC-o kam ka·giparangnasan ong·aigija JHADC aro KHADC-o kam ka·giparangnaba a·dok sorkari, apsan daken dormaharangko on·skana tik ka·angaha.
Sombar salo, a·dokni Chief Minister Conrad K Sangma, GHADC-ni Chief Executive Membor (CEM) aro Deputy CEM baksana a·dok sorkarini dingtang dingtang official-rang baksa GHADC-o ong·enggipa obostarangni bidingo chanchirimangani ja·man re·baenggipa November ja dipet ADC-rango kam ka·giparangni dormaharangko on·skana a·dok sorkari tik ka·angaha.
Ian gisik ra·na krabegipa ja·ku de·ani ong·enga ine janapatengon, ADC-rangko chalaianio tangka paisani gita neng·nikanirangko chagrongna nangengani a·sel kam ka·giparangna dormaharangko on·na man·jaengani gimin a·dok sorkari, ADC-rango tangka paisani gita ong·enggipa obostarangko namatna aro ADC-rangko chalaianio kamrangko namdapatna gita, kam ka·giparangni dormaharangko on·skana tik ka·angaha ine Chief Minister parakataha.
“District council-rangara an·chingna mongsonggipa bimangrang aro jatni chinrangba ong·a. Batanggimin bilsirango dingtang dingtang a·selrangchi ADC-rangko chalaianio neng·nikanirangko man·na nangaha aro ADC-rango kam ka·giparang aro uamangni nokdangrang indita neng·nikanirangko chagrongna nangahani gimin anga namen suk ong·jaha. District Council-rangara jakgitelgipa bimangrangsa ong·genchimoba chinga manderangni duk mikchirangko nie dongchana man·jaha aro da·alo ia ja·kuko de·na nangaha,” ine Sangma aganaha.
ADC-rango kam ka·giparangni dormaharangko on·na gita District Council Affairs department-ni Secretary-ni dilanichi committee-ko songgen indiba apsan somoion District Council-rangko chalaianio tangka paisani gita mangrakbatatna kamrangko ka·skagen ineba Chief Minister parakataha.
Chief Minister-ni parakatani gitade, ADC-rango kam ka·giparangni dormaharangko on·na gita a·dok sorkari daitoko jako ra·engoba, District Council-rangni jakgitel ong·ani, bil man·ani aro kamtangko ka·na man·anide skango gitan apsan ong·aigen aro District Council-rangni kamo a·dok sorkari maming dakeba jak on·paani dongjawa.
“ADC-rango kam ka·giparangni dormahako on·na tik ka·anio a·dok sorkari maming dakeba ADC-rangni kamrango jak on·paani dongjawa aro ADC-rangni jakgitel ong·ani aro bilrangde skango gitan apsan ong·en dongaigen,” ine Chief Minister parakataha.
“ADC-rango kam ka·giparangna dormaha on·na tik ka·aniko a·dok sorkari, Meghalaya a·dokni Governor CH Vijashankar-na u·iatchengesa aro GHADC-ni MDC-rang baksa chanchirimchengesa tik ka·aha,” ine Chief Minister parakataha.