Obostako namrenge ra·nade man·taijawa ine agana
SHILLONG: Meghalaya-o bobil dol nakattainasienga in koborrango jangani ja·mano, songsul Bangladesh a·songni obostarang tom·tomjaengani gimin indakgipa koborrangko dal·e ra·gija daknade man·jawa ine A·dokni Chief Minister Conrad K Sangma Mongolbaro aganaha.
Indake ong·engon, ian ong·chongmotgipa kobor inede agantaina man·jawa, nirikkigiparang namen kam ka·enga, aroba bobil dolrang nakattaibebenasiengama ma jangaiasama namedake sandichengna nanggen ineba CM aganaha.
Sima-arijolrango obostarang so·sojengjeng ong·engani gimin, a·dokni naljoke donganio kenchakanirangde donga, Sangma aganaha.
Unigisepon bobil dolrang tom·daktaiengama ma dongjama uko Sorkari da·o dipet sandie nia dongkuja ineba ua aganaha.
Bangladesh-ni obostarang da·sikkari bilsi gitade ong·jaha, uamangni kamrang dingtangaha. Indake sima-ari jolrango dingtang dingtang ong·gija kam ka·anirang nakatenga, jeni a·selan obostarang gimikni gitan dingtangaha ine nikatna man·a, Chief Minister aganaha.
“Bobil dol nakattelnasienga ine da·omanchade tik ong·e aganna man·ja. Indiba ong·enggipa obostarangni bidingo nirikkianirangko dakenga,’’ Sangma aganaha.
Ua indakeba talate aganaha je ning·joljol sandie watgipa koborrang authority-rangona pangnan sokenga, indiba uarangoni bang·bata a·selrangon a·doktangni denggurangsa ong·bataia, bobil dolrangoni ong·ja.
“Bangladesh-o ong·enggipa obostarangni a·sel beben da·o rakbate simsakbatnade nangengaha, jerangko niaba-nirokenga’’ ine Chief Minister Conrad Sangma aganaha.