TURA: Garo Hills Autonomous District Council (GHADC)-o kam ka·giparangna November ja dipet a·dok sorkari jaantini dormahako on·gnok ine Sombar salo, a·dokni Chief Minister Conrad K Sangma-ni parakatani ja·man, GHADC-o kam ka·enggipa manderang, uamangni man·na nangkuenggipa ja 43-ni dormaharangko man·kujaengani a·selsa neng·nikanirangko chagrongna nangengani gimin kamrangko dontongate jingjengatanirangko dakna nangenga ine Tura-ni MDC aro BJP-ni state vice president Bernard N Marak parakatenba, ia bangki ja 43-ni dormaharangko on·ani bidingo maming ku·rachakaniko on·jahani gimin Chief Minister-ko sing·doataha.
GHADC-ko man·chape a·dokni damgittam Autonomous District Council (ADC)-rangna a·dok sorkari, re·baenggipa November ja dipet jaantini dormaharangko on·gnok ine Sombar salosan a·dokni Chief Minister parakatahachim. November ja dipet jaanti dormaharangko on·gnok ine parakatahaoba, GHADC-o kam ka·enggipa manderangni man·na nangkuenggipa ja 43-ni dormaharangko on·ani giminde a·dokni Chief Minister maming ku·rachakaniko on·skajahachim.
Iani bidingo a·dokni Chief Minister-ko sing·doatengon, “ADC-rango kam ka·giparangna November ja dipet jaantini dormaharangko a·dok sorkari on·gnok ine CM-ni parakataniara nambegipa kobor ong·a indiba ia somoio GHADC-o kam ka·enggipa manderangni nangnike dabienganiara, uamangni man·na nangkuenggipa ja 43-ni dormaharangko on·china dabianisa ong·enga. Uni gimin ADC-rango kam ka·giparangna November ja dipet dormaharangko sorkari on·gnok ine CM-ni parakaniara, mongsonggipa dakna nanganikon daksretani gitasa ong·enga,” ine Marak parakataha.
GHADC-o kam ka·enggipa manderangni dabie jingjengataniara, jaanti dormahako on·china dabie jingjengatani ong·ja indiba NPP-chi chalaienggipa Executive Committee-ni bangki dongenggipa ja 43-ni dormaharangko on·china dabianisa ong·enga ine talataniko on·angengon, GHADC-o kam ka·giparangna ja 43-ni dormaharangko matchote on·ani ja·mansa November ja dipet jaantini dormahako sorkarini on·na miksongenganikode parakna nangachim ine Marak parakataha.
“GHADC-o kam ka·giparangni man·na nangkuenggipa ja 43-ni dormaharangko matchote on·ani ja·mansa CM, iani bidingo parakna nangani ong·achim indiba bangki dormaharangko on·ani bidingo maming ku·rachakaniko on·gija November ja dipet jaantini dormahako on·gnok ine parakaniara GHADC-o kajina man·enggipa department-rangko a·dok sorkarini ra·gopna miksonganiko mesokanisa ong·enga. CM-ni video-o jinmana parakatanichi GHADC-o kam ka·giparangni neng·nikanirangko namatna man·jaha,” ine Tura MDC parakataha.
ADC-rango kam ka·giparangna a·dok sorkari, bani tangkarangchi jaantini dormaharangko on·na miksongenga ine sing·doatskaengon, maming ja·kurangko de·na skangba, jinmana talatanirangko on·chengna nanga ine Tura MDC dabiangaha.