TURA: North Eastern Hill University (NEHU) Tura Campus-o dingtang dingtang kamrangna seokanio niamko ja·rikja ine A·chik State Peoples’ Front (ASPF), Shillong-o donggipa NEHU-ni Vice Chancellor-na badi ka·doataha.
NEHU-ni Vice Chancellor-na ASPF-ni badi ka·e sedoatani gitade, 2022 bilsio NEHU Tura Campus-ni kamrangna ra·anio niamrangko ja·rikjaha.
“2022 bilsini March 15 tariko NEHU-ni u·iataniko on·anio pangchake aro screening report-ni gitade baditaba sak candidate-rang, Deputy Registrar aro Assistant Registrar-ni kamna qualify ong·jachim indiba maming interview-rangko ra·gija candidate-rangko seokaha. Iandake kamna ra·anio niamrangko ja·rikgijaniara dongnue dakaniko mesokani aro candidate-rangni gisepo apsan cholko on·gijani ong·a,” ine ASPF-ni general secretary Bernita R Marak parakataha.
Marak-ni parakatani gitade, uni ja·man 2024 bilsioba deputy registrar sakbri aro assistant registrar sak 4-ni kamrangko man·chape dingtang dingtang non-teaching post-rangna gnigipa u·iataniko on·taiaha.
“Indake ong·genchimoba, ia kamrangna dorgasto galgipa candidate-rangko seokani bidingo da·alonan maming u·iatani dongkujaenga,” ine ASPF-ni general secretary parakataha.
NEHU Tura Campus-o indita bilsirangna A·chikrangoni contractual ba temporary staff ong·e kamko ka·enggiparang donga ine janapatengon, iandake kamna seokanio kamrangko ru·utatchae dongani aro niamrangko ja·rikgijaniara, ia manderangna kamrangko ka·e cha·na chol on·gijaniko mesokanisa ong·enga ine Marak matnangataha.
NEHU Tura Campus-o A·chik Deputy Registrar aro A·chik Assistant Registrar-ko seokna nangengani giminba ASPF janapataha.
2022 bilsio shortlist ka·a man·gipa candidate-rangna maini gimin interview-ko ong·atjaha aro 2024 bilsio advertise ka·gipa kamrangna dorgasto galgipa candidate-rangoni seoka man·gipa candidate-rangko maini gimin parakchipkujaenga, iarangni bidingo talataniko on·china gitaba ASPF-ni general secretary dabiangaha.