SHILLONG: Meghalaya a·dokni damgittam Autonomous District Council (ADC)-rang, chong·motan Garo Hills Autonomous District Council (GHADC), Khasi Hills Autonomous District Council (KHADC), aro Jaintia Hills Autonomous District Council (JHADC)-o kam ka·enggiparangna jaantini dormaharangko on·e dakchakna tik ka·aniko Mongolbar salo a·dokni Cabinet ra·chakangaha indiba dormaharangko on·na gita dakchakanirangko on·engon, ADC-rango tangka paisani gita bilakbataniko ra·baskana nanggen ine niamko donangaha.
ADC-rango kam ka·giparangna dormaharangko on·na gita sorkari dakchakanirangko on·engon, ia dakchake on·aniko ADC-rang ra·chakna ba jegalnaba man·aigen ine a·dok sorkari tik ka·angaha.
Ia damgittam ADC-rang baksa agangrikna a·dok sorkari, sub-committee-rangko songgen aro sal 45-ni gisepon ia sub-committee-rang, a·dok sorkarina report-ko on·eani ja·mansa a·dok sorkari, report-ko nienba, ADC-rangna tangka paisani gita dakchake on·ani kamrangko a·bachenggen.
Iani bidingo talataniko on·angengon, ADC-rangko chalaianio tangka paisani gita neng·nikanirangko chagrongna nangengani giminsa a·dok sorkari, ADC-rango kam ka·giparangna jaantini dormaharangko on·e dakchakna tik ka·aha ine a·dokni Chief Minister Conrad K Sangma parakataha.
ADC-rangara Indian Constitution aro Parliament-ni on·gimin bilrangchi jatni daka rikaniko chel·chakna dongimin bimangrangsa ong·a aro iandake dakchakanirangko nangengmiting somoirango a·dok sorkari, ADC-rangna dakchakanirangko on·na nangaia ineba ua aganaha.
Ia dakchakanirangko ra·china gita darang district council-rangkon dranade man·jawa aro ia dakchakaniko ra·ani ba ra·gijanide uamangni skaniosa ong·aigen ineba Sangma aganaha.
ADC-rango tangka paisani kamrangko nirokna gita MCS ba IAS officer-ni gadango principal secretary dongna nanggen ineba Chief Minister parakataha.
“ADC-rango principal secretary-ko donna miksonganide, sorkarini dakchake on·enggipa tangka paisarangko name jakkalama jakkalja aro mai kamrangna jakkalenga, uarangko nirokanian ong·enga,” ine Sangma talataniko on·angaha.
ADC-rangna a·dok sorkarini dakchakaniko on·aniara, tangka paisani gita dakchakaniko on·anisan ong·aigen indiba district council-rangna on·gimin bil aro daka rikanirango jak on·paanide dongjawa ineba Chief Minister talataniko on·angaha.
District council-rango ong·enggipa obostarangni gimin talataniko on·angengon, re·anggipa bilsio GHADC-o kam ka·giparangna dormahako on·na gita gong kror 70-mangko nangachim indiba kajina gile man·aniara crore 25-na baten komiani gimin gong kror 40-45-mangni gitade tangka paisarang chu·ongjachim ine Sangma aganaha.
“KHADC-ko chalaianio tangka paisani gita neng·nikanirang donggenchimoba kam ka·giparang sak 800-mangsan dongaiani gimin dormaharangko on·aniode inditana neng·nikanirangko chagrongna nangjaha. GHADC-oba da·o kam ka·giparangko sak 1300-mangona komiatna man·aha,” ine Sangma aganaha.