SHILLONG: Meghalaya a·dokni damgittam Autonomous District Council (ADC), chong·motan Garo Hills Autonomous District Council (GHADC), Khasi Hills Autonomous District Council (KHADC) aro Jaintia Hills Autonomous District Council (JHADC)-o kam ka·giparangna a·dok sorkari, dormaharangko on·skana tik ka·aniko Khasi Students Union (KSU) aro dingtang dingtang dolrang jegalatani ja·man ADC-rango kam ka·giparangna dormaharangko on·e dakchakna sorkarini tik ka·aniara District Council-rangna on·gimin bilko ra·sekna jotton ka·ani ong·ja ine a·dokni Cabinet Minister aro MDA-na ku·wattimgipa Ampareen Lyngdoh parakataha.
ADC-rangna sorkarini dormaha on·na tik ka·aniara district council-rangna on·gimin jakgitelaniko bon·atani cholrang donga ine Robibar salo KSU, jajrengchakaniko parakatahachim.
ADC-rango kam ka·giparangna sorkarisa dormaharangko on·genchimode ja·mano ADC-rangni jakgitele chalaina bil man·aniko ka·sinsin bilgriatani gita ong·aigen aro ja·manode ia district council-rang, sorkari department-rang gitasan ong·aignok ine KSU-ni president Lambokstarwell Marngar aganaha.
KHADC-o tangka paisarangko jakkalanirang nambatani a·sel iandakgipa obostarangko chagrongna nangjaenga ine janapatengon, gipin ADC-rangoba nangana bate kam ka·giparangko rakkiani a·selsa tangka paisani gita neng·nikanirangko chagrongna nangengakon ine Marngar aganaha.
ADC-rangna dormaharangko on·ani pal, ADC-rangni man·na nanggipa kajinarangko somoi gita on·skachinaba ua ku·pattianiko on·angaha.
ADC-rango kam ka·giparangna sorkarisa dormaharangko on·genchimode ja·mano kam ka·giparang, sorkarini ge·etanirangkosa ja·rikna nanggnok aro unode seoka man·gipa MDC-rangni daitorang gimaroroanggnok ineba KSU-ni president mikrakataniko on·angaha.
ADC-rangna on·gimin jakgitelani aro bilrangko bon·atjana gita maming ja·kurangko de·na skangba ADC-rang aro dingtang dingtang dolrang baksa chanchirimchengchina gitaba ua a·dok sorkariko didiataha.
KSU-ni iandake agananiko jegalatskaengon, skangonin sorkari, ADC-rangna dakchakanirangko on·enga aro ia dakchakaniba ADC-rangni nangan somoio jakkaldilani gitasa ong·enga ine Cabinet Minister Ampareen Lyngdoh parakataha.
ADC-rango kam ka·giparangna dormaharangko on·aniara ADC-rangni jakgitelani aro bilrangko bon·atani gita ong·gen ine agananiko jegalatskaengon, “District council-rangko jakkandilanichi sorkari, Constitution-ni badiaba badiaba niamrangko pe·enga ine aganenga ong·ode uan ong·ja. Chinga ADC-rang baksa ku·cholsan ong·e kamko ka·a, miksonganirangkoba apsanan chu·sokata aro ia somoioba chinga dakchakanikosan on·aienga,” ine Lyngdoh aganaha.