TURA: Garo Hills-ni B-Mahal ning·o, chong·motan Medhipara, Motapara aro Borogobal songrango bangbang ong·e dongenggipa biapo Bamboo Hub Industry ba wa·a karkana kulina miksonganiko dingtang dingtang dolrang aro songni manderangba namnike ra·chaktokaha ine Budbar salo, jolo donggipa dingtang dingtang dolrang, West Garo Hills a·jani Deputy Commissioner-naba seachi u·iatenba, ia karkanako kulianio dakchakaniko on·china didiataha.
NGO-rangni Deputy Commissioner-na sedoatgipa chittio parakatani gitade, ia jolrango wa·a karkanako kuliani bidingo chanchirimna gita dingtangmancha jinma tom·bimonganiko re·anggipa August-ni 25 tariko, Pedaldoba kal·chakramo ong·atangaha aro ia tom·anio, Tikrikilla, Raksamgre, Phulbari, Pedaldoba aro North Garo Hills a·jaoni dingtang dingtang dolrang, Nokma-Sordarrang, ma·giparang, toromko dilenggiparang aro songni nokni manderangba bang·en bak ra·angtokaha.
Ia jolrango Assam-ni manderangsa napsrukbae, bagan barirangko dakenga aro ro·ongrangko cha·ue bikotengani gimin dingtang dingtang dolrang aro songni nokni manderangba, ia biapo wa·a karkanako kulina on·na gita namnike ra·chakangtokaha ine NGO-rang parakataha.
“Ia biapo wa·ani karkanako kuligenchimode, ian mikkangchi Assam-oni napsrukbaenggiparangko champengsoani mingsa namgipa chol ong·gnok aro napsrukbaenggipa manderangko champengsoasan ong·aigija ia karkanao A·chik a·songni manderangba sak 5000-na baten kamrangko ka·e cha·pana cholrangko man·gnok,” ine jolni NGO-rang, Deputy Commissioner-na sedoatgipa chittio parakataha.
NGO-rangni Chief Minister-na sedoatani gitade, ia biapo wa·a karkanako kuliahaode jolo songdongenggipa manderang, gipin biaprangona re·ange kamrangko ka·e cha·na nangjawaha aro songtangon donge kamrangko ka·e cha·pana chol ong·gnok ine ia tom·anio dingtang dingtang dilgiparangba ra·chakangaha.
 |
|