MANGSANG: East Garo Hills a·jani Mangsang jolna dingtang Community & Rural Development (C&RD) Block-ko on·china dabie, Budbar salo GSU Mangsang regional unit, FKJGP Mangsang circle aro Mangsang Block Demand Committee-ni dilanichi, jinma tom·bimonge re·jomaniko Mangsang songo ong·atangaha.
Jinma re·jomani ja·man dingtangmancha tom·bimonganiko Bamil Government LP skulo ong·atangaha aro ia tom·bimonganio, jolni MDC Henen R Sangma aro dingtang dingtang dilgiparangba bak ra·angaha.
Koborko on·ani gitade, Mangsang jolo dol 55 VEC-rang aro sak 25,000-na baten manderang donga aro Mangsang jolrangara rama jal·langni gitaba re·a doanio neng·nikanirangko chagrongna nangengani gimin ia jolna dingtang C&RD Block-ko nangenga.
2017 bilsioni tarina a·bachenggipa Adokgre-Mangsang-Rongjeng ramako da·onan matchotchipkujaengani gimin ia tom·bimonganio, dingtang dingtang dolrang, ia ramakoba ta·raken matchotate on·china dabiangjolaha.
Rongjeng-ko Civil Sub-Division songani ja·man Mangsang jolna dingtang C&RD Block-ko on·china dabina a·bachengaha aro unbaksana Mangsang PHC-ko Community Health Centre (CHC)-ona ra·doatchina, Mangsang police outpost-ko police station-ona ra·doatchina aro Mangsang jolo fire & emergency service-ko kulichina gitaba Mangsang jolo songdongenggipa manderang aro dingtang dingtang dolrang dabiangtokaha.
Ia tom·bimonganiko ong·atanio, Mangsang Block Demand Committee-ni organizing secretary Sengwil Sangma, jinmana aganprakengon, Mangsang-ko block songchina dabienggipani bidingo uamang, Rongjeng MLA Jim Sangma aro MDC baksa changbrina kingking a·dokni Chief Minister Conrad K Sangma-ko gronge agangrikaha aro da·o dipet Mangsang jolna Block-ko on·ani bidingo a·dokni Chief Minister, ku·rachakaniko on·kujaengoba ia jolna gital C&RD Block-ko dabianio 75 percent-ni gitade chu·sokengaha ine parakataha.
Ia tom·bimonganio jolni MDC Henen R Sangma-ba jinmana aganprakengon, Rongjeng-ko Sub-Division songani ja·man ua an·tangba Rongjeng MLA baksa a·dokni Chief Minister-ko gronge, Mangsang-ko Block songskachina agangrikaha ine parakataha. Ia dabianiko chu·sokatna gitade, Mangsang jolrango songdongenggipa pilakan bakrimaniko on·na nanggen ineba ua aganaha.
Jinma re·jomaniko ong·atani ja·man GSU Mangsang regional unit-ni president Barnawel Sangma, kobor ra·timgipa manderangna talataniko on·angengon, Mangsang-na dingtang C&RD Block-ko on·china aro gipin dabianirangara, Mangsang jolrango songdongenggipa manderangni ru·uta bilsirangna dabienggiparangan ong·a ine parakataha.
Mangsang jolna dingtang C&RD Block-ko on·genchimode, ia jolrango songdongenggipa manderangni dingtang dingtang neng·nikanirangko komiatna man·gen ineba ua aganaha.
Photo: Mangsang jolna dingtang Community & Rural Development (C&RD) Block-ko on·china dabie, GSU Mangsang regional unit, FKJGP Mangsang circle aro Mangsang Block Demand Committee-ni dilanichi, jinma tom·bimonge re·jomenga.