SHILLONG: Bilsi 17-na skang, skigiparangko ra·anio ong·gija dakanina matnangako man·gipa a·dokni gitcham Education Minister aro da·o Health Minister ong·enggipa Ampareen Lyngdoh-ni kosako matnanganiara kakket ong·ja ine parakatani ja·man Meghalaya High Court, uko jakgitel wataha.
Supreme Court-ni ukil aro Salman Khurshid-ni junior counsel Sanchita Ain-ni kobor ra·timgiparangna parakatani gitade, iani bidingo High Court-ni order-ko mesokatkujaengoba, Lyngdoh-ni kosako matnanganirangko donataha aro da·o uni kosako maming case-rang dongjahani gimin uko ia matnanganioni jakgitel wataha ine kachari parakataha.
2008-09 bilsirangni gisepo a·dokni lower primary skulrangna skigiparangko seokanio candidate-rangni score sheet-rangko taridapahani gimin aro skigiparangko seokanio kragija dake jakko on·paahani gimin ning·tue sandianirangko dakchina gita 2016 bilsini November 2 tariko Meghalaya High Court, CBI-na pakwate on·ahachim.
High Court-ni ge·etanio pangchake CBI, a·dokni gitcham Education minister aro gipin official-rangni kosako dingtang dingtang IPC section-rango pangchake FIR-ko ka·aha.
Ia ‘Education scam’-ni bidingo CBI, a·dokni gitcham Education Minister aro Congress MLA Ampareen Lyngdoh baksana a·dokni gitcham Education officer JD Sangma aro gipin politician-rangko man·chape sak 400-na baten dingtang dingtang manderangko sing·sandiahachim.
High Court-ni rai on·aniko CBI, Supreme Court-o dakgrikgenma ine sing·anina aganchakaniko on·angskaengon, High Court-ni rai on·anikon Supreme Court-ba ra·chakaigen ine ukil Sanchita Ain, an·tangni ka·dongchakenganiko parakataha.
Ia case-ko da·o chipataha ine janapatengon, iani bidingo jeba kachario ra·bina gita bil dongaia indiba Meghalaya High Court-de Lyngdoh-ni kosako matnanganirangko kakket ong·ja ine nikahani gimin jakgitel wataha ine ukil parakataha.
Lyngdoh-ko iandake High Court-ni jakgitel watani ja·man, uni nokdangni manderang aro una chakpaenggipa manderangba uko kusi ong·bee rimchaksotokaha.