TURA: Adita salrangna skang, GHADC-o ong·enggipa obostarangni bidingo aro Tura Medical College-ko chalaiani bidingo a·dokni Chief Minister Conrad K Sangma baksa dingtang dingtang dolrangni tom·e chanchirimengmiting somoio kragija dake chief minister aro dal·batgipa manderangni mikkango aganaha ine matnangenba, MBBS-ko poraienggipa chatro saksako chief minister-o aro dingtang dingtang dolrango kema bi·china dabiahani gimin National People’s Youth Front (NPYF)-ko Imphal songjinmao donggipa Regional Institute of Medical Sciences (RIMS)-ni Association of Meghalaya Medical Students (AMMS) raken jegalataha.
Sorkarini ong·gija dakgipa kamrangna ku·rang on·aniko jegalatenba, ia chatroko kema bi·china dabiahani gimin NPYF-ni kosako matnangatengon, “Indian Constitution-ni Article 19(1) (a)-ni ning·o India a·songo songdongenggipa mande sakantian ku·rang on·na aro sorkarini kosako jegale mesokna bilrang donga. Ia on·gimin bilo pangchakesa chinga chatro chatrirang ong·e, Tura Medical College-ko Public-Private Partnership (PPP)-ni gadango chalaina sorkarini tik ka·aniko jegalaha. Iandake ku·rang on·aniko jegalaniara a·songni manderangna niam bidiko bil on·aniko aro manderangni ku·rang on·aniko champengna jotton ka·anisa ong·a,” ine AMMS-ni general secretary Balgrik M Sangma parakataha.
Indian Constitution-ni Article 21-ni ning·o janggi tangna aro jakgitelaniko man·na bilko on·a ine janapatskaengon, ia bilo pangchake chatro chatrirang, a·dokni sanna banani kamrangna ku·rangko on·na man·a ine AMMS parakataha.
“Uni gimin NPYF-ni kema bi·china dabianiko chinga raken jegalenga maina sorkarini kosako ku·rang on·aniara chief minister-ni mikkango ong·gija dakani ba uni kosako agananiko mesoka ong·ja indiba ian a·songni on·gimin bilko jakkalanisan ong·aia,” ine AMMS-ni general secretary parakataha.