SHILLONG: National People’s Party (NPP)-o napanggipa Congress dolni MLA-rangko ra·galchina Meghalaya Pradesh Congress Committee (MPCC) dabiengon, iani bidingo darangba uko dokkol ka·na man·jawa aro ua darangnaba mikkang niteani grian niam bidiko pangchakesa ja·kuko de·anggen ine Robibar salo, Meghalaya Legislative Assembly-ni Speaker Thomas A Sangma parakataha.
“Darangan an·tangtangni dabianirangko ra·e re·bana man·aigen indiba anga an·tangni kamko niamo pangchakesa ka·gen. Anga darangni dabiani ba sing·anirangnaba bame on·jawa. Anga ia kamko darangnaba mikkang niteani grisa angna on·gimin bilo pangchake chu·sokatgen,” ine Sangma aganaha.
NPP-o napanggipa sakbri MLA-rangko ra·galchina gita adita salrangna skangsan Congress dol, Assembly-ni Speaker Thomas Sangma-ko didiangahachim.
Congress dolni nangnikani gita ong·gija Assembly-ni Speaker, ja·kuko de·a ong·ode Congress dol, Meghalaya High Court-o ra·biskagen ineba MPCC-ni dilgiparang parakatahachim.
“Congress MLA-rangni kosako badi ka·aniko anga a·dokni Congress dolonikosa man·soaha, MLA-rangoniko ong·ja. Congress dolo da·o MLA-rang dongjahani gimin party-ni gitasa badi ka·aha. Uamangni badi ka·aniko anga nipiltaikuenga aro iani bidingo anga ainni gita ku·pattianirangkoba ra·enga. Bakan anga iani bidingo ja·kuko de·anggen aro aganchakaniko on·gen,” ine Assembly Speaker aganaha.
NPP-o napanganina badi ka·a man·gipa sakbri MLA-rangara, Ronnie V. Lyngdoh, Celestine Lyngdoh, Gabriel Wahlang aro Charles Marngar ong·achim.
Iako Congress dolni dilgiparang, Assembly-ni Commissioner & Secretary Andrew Simons-o badi ka·doangahachim.