SHILLONG: Meghalaya a·dokni Sohra jolo so·otako man·gipa Raja Raghuvanshi-ni jikgipa Sonam aro uko so·otanio jak donggipa gipin manderangna siani sastiko on·china so·ota man·gipa Raja-ni nokdang, kachario dabiangaha.
Raja Raghuvanshi-ko so·otanio jak donggipa manderangko Meghalaya Police-ni chargesheet ka·angani ja·man, ia manderangna siani sastiko on·china Raja Raghuvanshi-ni nokdang dabiangaha.
Raja Raghuvanshi-ko so·otanina Meghalaya Police, Sonam aro gipin sakgni manderangni kosako, sakkirang baksa king 790 donggipa chargesheet-ko Sukrobar salo file ka·angaha.
Raja Raghuvanshi-ko so·otanina police-rang, gimik sakchet manderangko rim·ahachim aro uamangara, uni jikgipa Sonam Raghuvanshi, Sonam-ni mikchagipa Raj Kushwaha, Akash Rajput, Anand Kurmi, Vishal Chauhan, Shilom James, Balbir Ahirbar aro Sonam-ni dongnuchakgipa nokni nokgipa Lokendra Singh Tomar ong·achim.
Shilom James, Balbir Ahirbar aro Lokendra Singh Tomar-nade kachari, jaminko on·skaahachim.
Ia manderangko police-rang, Bharatiya Nyaya Sanhita (BNS)-ni dongimin niamrango pangchake, Raja Raghuvanshi-ko so·otna chalakki dakahani gimin aro sakkirangko kimitna jotton ka·ahani gimin rim·aha.
“Angni nokdango mingsa dabianisan dongaia aro uan Sonam aro Raj Kushwaha baksana gimik sakbonga manderangkon pasi on·na nanga,” ine Raja-ni adagipa Vipin Raghuvanshi, Indore songjinmao, kobor ra·timgiparangna aganaha.
Da·o dipet uamang an·tangtangde chu·gimik chargesheet-ko nikkuja indiba police-rangni kamko uamang chu·ongnikaiaha ineba Vipin aganaha.
Indore songjinmaoni bia ka·daldale re·bagipa Raja Raghuvanshi aro Sonam-ni gimaangaoni salchetni ja·man June 2 tariko Raja-ni sogimin manggisiko, Sohra jolo donggipa Wei Sawdong Falls sambaoniko man·ahachim. Raja-ni manggisiko man·ani ja·man Meghalaya Police, SIT-ko songe, ia a·selni bidingo sandirokna a·bachengaha aro ia mandeko so·otanina uni jikgipa Sonam, uni mikchagipa Raj Kushwaha aro uamangni so·otna tik ka·gipa mande sakgittamko rim·na man·aha.