TURA: Indian Institute of Technology (IIT) Guwahati-ni Design Department-ni ning·o donggipa Design Innovation Centre (DIC), West Garo Hills Deputy Commissioner-ni office baksa nangrime mijal Sombar aro da·al Mongolbar salo salgnina, ‘Abhilasha’ design awareness program-ko Tura-ni District Auditorium-o ong·atenga. Ia awareness program-ko ong·atna gita India sorkarini Education Ministry dakchake on·enga.
Ia awareness program-ko a·bachengatanio, West Garo Hills a·jani Deputy Commissioner Vibhor Aggarwa, mongsonggipa sokgipa ong·e, program-o bak ra·giparangna aganprakangengon, ia program-ko chatro chatrirangna ong·atengani gimin IIT Guwahati-ko mittelpilangenba, maikai design tariani kamrangko ka·na skie ra·anichi an·tangtangni neng·nikanirangko namatna man·a, uarangni bidingo agan-talatanirangko on·angaha.
Design tarianiara India a·songo gital kam gitasa ong·kuenga ine janapatengon, ia program-ara bang·bata chatro chatrirangnan design-ni kamrangko skie ra·na namgipa chol ong·gen ine Aggarwal aganaha.
Chatro chatrirangna dingtang dingtang janggi tangani cholrangko on·na gita sorkarini a·bachengatgipa Chief Minister’s Career Guidance Scheme-ni kamrangkoba Deputy Commissioner mittelpile aganangaha.
Ia awareness program-ni skanggipa salo, class 11 aro 12-o poraienggipa chatro chatrirangna design-ni mongsonggipa kamrangko skie on·angan baksana dingtang dingtang janggi tangani cholrangkoba agan-ku·pattie on·angaha.
Gnigipa sal, chong·motan da·al Mongolbar salni bako dingtangmancha Class 9 aro 10-ni chatro chatrirangna design ka·anirangko skie on·angskagen.
Ia ‘Abhilasha’ awareness program-ko ong·atanio dingtang dingtang skulrangoni chatro chatrirang bak ra·enga.
Photo: ‘Abhilasha’ awareness program-ko ong·atanio dingtang dingtang skulrangoni chatro chatrirang bak ra·enga.