TURA: Assam a·dokni South Salmara a·jao donggipa Tumni songni Ashikul Momin Khandakar minggipa mandena Garo Hills Autonomous District Council (GHADC), Trading for Non Tribal (TNT) licence on·aha ine A·chik State People’s Front (ASPF) matnangatenba, ia mandena on·gipa TNT licence-ko den·galpilchina dabiangaha.
Iani bidingo GHADC-ni Chief Executive Membor (CEM) Albinush R Marak-na sedoatengon, TNT-koa Meghalaya a·doko, mongsongbate Garo Hills-o songdongenggipa Tribal jatrangko chel·chakna gitasa dingtang dingtang niamrango pangchake gipin jat bading chiwalgiparangna on·achim ine ASPF parakataha.
“TNT licence-ko on·na dongimin niam gitade, ian Garo Hills-o songdong a·chae bading chiwale cha·enggipa gipin jatrangnasa miksongani ong·achim indiba Assam-ni Ashikul Momin Khandakar minggipa mandena TNT licence-ko on·aha ine chinga ma·sina man·aha. Uni gimin ia mandeara, TNT licence-ko man·ani ong·ja,” ine ASPF-ni general secretary Bernita R Marak parakataha.
ASPF-ni GHADC CEM-na badi ka·e sedoatani gitade, ia mandeara, Assam a·dokni Mankachar South Salmara a·jao donggipa M/s Momin Biri Factory-ni nokgipa ong·a ine a·kangani gimin ia mandena, uni tarigipa Biriko Garo Hills-o bading chiwalna gita TNT licence-ko on·ahachim.
“Indake ong·genchimoba ia biri factory-ni bidingo chinga am·sandion, Assam-ni iandakgipa biapo indakgipa biri factory-an dongja ine ma·sina man·aha. Unbaksana Assam-o uni niam pe·anirangna uni bosturangkoba sorkari palna on·jaha. Uni gimin ia mandena TNT licence on·aniko ta·raken den·galpilchina chinga GHADC-ko didienga,” ine Marak parakataha.
