Game ge·e cha·giparangni janggi tanganio dingtanganiko ra·bachina officer-rangko CM didia
SHILLONG: Kamo rimnapa man·gipa 2025 bilsini Meghalaya Agriculture Service (MAS)-III officer-rangna Bristibar salo, dingtangmancha Induction Training Program-ko Upper Shillong-ni IATC-o ong·atangaha aro ia program-ko ong·atanio, a·dokni Chief Minister Conrad K Sangma, Agriculture Minister Timothy D Shira, Chief Secretary Dr Shakil P Ahammed, Agriculture department aro dingtang dingtang department-ni official-rangba bak ra·angtokaha.
Ia program-ko ong·atanio a·dokni Chief Minister, jinmana aganprakangengon, kamo rimnapako man·gipa gital officer-rangna an·tangni namgipa skaniko on·angenba, ia gital officer-rangna training aro orientation program-ko ong·atahani gimin IATC-ko mittelpilangaha.
“Bang·a changon, dingtang dingtang department-rang, officer-rang aro organization-rang, dakna nanggni kamrangko gisiko nikatgenchimoba, ia kamrangko be·en pil·atna man·rongja aro iani a·selan an·chingni chanchiani aro kam chu·sokanio dingtangronga,” ine Sangma aganaha.
Sorkarini miksonganirangko chu·sokatna gita onbatgipa gadangonin sorkari aro official-rangni gisepo nangrime kamrangko ka·na nanga ineba Chief Minister aganaha.
Sorkari aro game ge·e cha·giparangni gisepo nangrimatani kamrangko nambate ka·na man·na gita sorkarini mongsonggipa daitorangko ma·sie ra·china gitaba Chief Minister, gital officer-rangko didiangaha.
Kamtangtangko ka·engon, pangnan game ge·e cha·giparangko skanggipa ong·e donchina gitaba Sangma didiangaha.
“Game ge·e cha·giparangni janggi tanganio dingtanganiko ra·bana man·na gita an·tangtangni ia kamko ka·ani miksonganiko ma·sina nangchongmota aro ian na·simangko dilgipa ong·na nanga,” ine ua aganaha.
Dingtang dingtang neng·nikani aro ra·bianirangko chagrongna nangon duk ong·jachina indiba game ge·e cha·giparangni janggi tanganio dingtanganiko ra·bana gitasa ka·oksiani gnang kamrangko ka·china gita a·dokni Chief Minister, gital MAS officer-rangko ku·pattiangaha.
Ia tom·anio, a·dokni Agriculture Minister Timothy D Shira-ba jinmana aganprakengon, a·doko songdongenggipa manderangni 70 percent-de songadam nokadamrango songdonggiparangsa aro uamangoni bang·batan game ge·e cha·giparangsa ong·a ine aganenba, “An·chingni a·doko game ge·e cha·enggipa manderangni obosta namjaenga aro kangal cholgrigiparangsa ong·ani gimin game ge·e cha·giparangni janggi tangani gadangko namdapatanide na·simangni jakon ong·gen,” ine parakataha.
Gital officer-rang bang·batan a·palrangosa kamrangko ka·gen ine janapatengon, ia officer-rang, game ge·e cha·giparang baksa agangrikjringna nanggen ine game ge·e cha·enggipa manderang baksa pangnan nama bewalo, chakchikani baksa agangrikchina gita Shira, gital officer-rangko didiangaha.
