SHILLONG: Opposition MLA-rangni constituency-rango maming namroro silroroani dongjaenga ine Bristibar salo, a·dokni Chief Minister Conrad K Sangma, Voice of the People’s Party (VPP) aro party-ni president Ardent Miller Basaiawmoit-ko miksonge matnangataha.
Bristibar salo, United Democratic Party (UDP)-ni dilgipa Lambor Malngiang-ko NPP-ona rimchaksona gita tom·bimonganiko ong·atanio jinmana aganprakengon, Opposition MLA-rangni constituency-rango maming namroro silroroaniko nikna man·jaenga ine a·dokni Chief Minister aro NPP-ni national president Conrad Sangma matnangataha.
“Opposition MLA-rangni constituency-rango MLA scheme-ko name jakkalama jakkaljaenga anga ma·sija. MLA-rang aro MP-rang an·tangtangni scheme-rangko maikai jakkalenga, uko ma·sie ra·na gita manderang RTI ka·na nanga,” ine Sangma aganaha.
VPP-ni kosako matnange aganangkuengon, India a·songni gipin biaprango aro a·gilsak gimikon opposition MLA-rang, namroro silroroaniko ra·bana gita sorkari baksa bakrime kamrangko ka·a ine Sangma aganaha.
“Indiba an·chingni a·dokode mitam dilgiparang aro party-rang, Chief Minister-ko grongna aro agangrikna gita jechakskaaha. CM baksa agangrikna sikjaengani ortode uamang an·tangtangko seokani ortokon ma·sijaenga ba nichanggalenga. A·dokni constituency ge·antinan sorkaride namroro silroroaniko on·na ska, indiba namroro silroroaniko on·na gita dilgiparang dongjani a·sel cholgri ong·enga,” ine Sangma aganaha.
“A·doko dingtanganiko ra·bana gita sorkarini kamrangko Opposition dolrang ma·sienga indiba ia kamrangko uamang manderang ra·chakjachina nangnikenga. Iarangni gimin uamang agangrikani pal batesa, manderangko dilsretna gita tol·e jangbingbangatna jotton ka·enga,” ineba ua aganaha.
NPP-o meligrikgijanirang ong·katenga ine adita salrangna skang koborrangko on·gipani bidingo janapatengon, ua a·dokni Deputy CM Sniawbhalang Dhar aro Prestone Tynsong baksa ku·sik on·grikjaenga ine koborrangko niksoa bakan ua Dhar-na phone ka·atenba, ua uko ka·o nangengama ine sing·sandiataha ine Sangma aganaha.
MDA sorkarini ning·o basakoba chanchianirang dingtanggriknaba gnang aro basakobade maiba kamrangna meligrikjaenganaba gnang indiba uamang pangnan ku·cholsan ong·en kamko ka·angkuaigen ineba Sangma aganaha.
