AMPATI: South West Garo Hills a·jani Ampati constituency ning·o donggipa Gare Bokmangre SSA UP skulo nokkingrang selprurue aro do·gacholrang namjae, neng·nikanirangko chagrongna nangenga ine kobor on·aha.
Kobor on·timgiparangni u·iatani gitade, ia Gare Bokmangre SSA UP skulara, Ampati-oni km 5-mangsan chel·grikaia aro ia skulo sak 25 chatro chatrirangna, UP skulni niamo pangchake, skigipa sakbri skie on·enga. Ia skulko 2001 bilsio kulichengaha aro da·o ia skulo, 2022 bilsio gong lak 6.5 korosrangchi rikgipa kuturi ge·sako man·chape gimik kuturi ge·bonga donga.
Skuloni koborko on·ani gitade, 2022 bilsio mikka balwa ta·rakani somoio ia skulni nokkingko nosto ka·angaha aro untalan ia skulo neng·nikanirangko man·na a·bachengaha.
“2022 bilsio skul nokni nokking nosto ong·aonin chinga mikkarang waahaode class-rangko ra·na man·jaha aro chatro chatrirangnaba mikka chaknamangmangba biaprangan dongja. Gitcham skul nokni kuturi ge·brian nokkingrang selpruprue mikka waahaode class-rangko ra·na man·jaengaha. Ia skul nokni do·ga aro kelkirangba namsrangjahani a·sel chinga neng·nikanirangko chagrongna nangenga,” ine skulni headmaster Greten Marak parakataha.
Skul headmaster-ni parakatani gitade, ia skulna chalk-mangmangkoba brena gita uamang, district education office-oniko tangka paisarangko man·jaenga aro iandake maming dakchakanirangko man·jaengani a·selan skul nokkoba taridapna man·chipkujaenga.
Ia skul nok nosto ong·na skangde, ia skulo poraigipa chatro chatrirang bang·kalachim indiba skul nok nosto ong·aonin manderang, an·tangtangni dedrangko ia skulo poraiatna siktokjaha ineba ua aganaha.
“Ia skul nokko rikna gita chinga Deputy Commissioner, DSEO, BDO aro election campaign-na re·baani somoio CM-koba gronge tangka paisarangko dakchake on·china mol·molahachim indiba da·alonan maming dakchakanirangko man·kujaenga,” ine skulni headmaster aganaha.
Ia skul noko do·ga kelkirang namjani a·selan 2022 bilsio ia skulni computer ge·gni aro 24W battery ge·briko cha·uangna man·aha ineba skulni headmaster parakataha.
“Ia skulna gital nokko rikchengani somoiode chinga skulni nangchongmotgipa lekkarang aro bosturangko ia rikdapgipa kuturio donchakna man·achim indiba da·ode ia skul nokni do·gaba namjaengahani gimin skulni gamchatgipa bosturangko common room-on donna gita draatako man·engaha,” ine ua aganaha.
