SHILLONG: Megha Health Insurance Scheme (MHIS)-ni namgnirangko a·dokni manderang nambate aro altubate ra·na man·na gita Meghalaya Legislative Assembly-ni Public Accounts Committee (PAC), an·tangtangni sandie man·aniko ta·raken chapa ka·enba, nangchakegipa dingtang dingtang department-rangna on·anggnok.
Sombar salo PAC-ni chairperson Miani D Shira-ni dilanichi, committee-ni membor-rang, MHIS-ni kamrangko nipilna gita Shillong songjinmani Civil Hospital Shillong, Ganesh Das Hospital, North Eastern Indira Gandhi Regional Institute of Health and Medical Sciences (NEIGRIHMS), aro Super Care Hospital-ona re·angaha.
Ia hospital-rangona re·anganio PAC-ni membor-rang, hospital-ni dilgiparang aro MHIS-ni official-rang baksa agangrikenba, maikai hospital-rango MHIS-ko chalaienga, uarangko ma·sie ra·na gita agangrikangaha.
Ia hospital-rangona re·anganio kobor ra·timgipa manderang baksa agangrikengon, a·dok sorkari, ma·mong aro private hospital-rango maikai MHIS-ko chalaienga, uarangko ma·sie ra·na gita ia hospital-rangona re·angaha ine PAC-ni chairperson Miani D Shira parakataha. Ia scheme-ni ning·o tarigimin niamrangko mittelpilangengon, hospital-rango MHIS-ko chalaianio dingtang dingtang neng·nikanirangko chagrongna nangkuenga ine Shira aganaha.
MHIS-ni kamrangko nambatatna gita uni committee kamrangko ka·angkugen ine janapatengon, MHIS-ko a·dokni pilak manderangan man·na nanga aro scheme-ko ra·anio maming neng·nikanirang dongna nangja ine Shira aganaha.
Ia hospital-rangona re·ange agangrikanio uamang, MHIS-ko namdapatna gita dingtangmancha seachi u·iatna gitaba tik ka·aha ine Shira aganaha.
Ia hospital-rangona re·anganio PAC baksa dongpagipa gipin membor-rangara, Dr. Celestine Lyngdoh, Brightstarwell Marbaniang, Rupa M. Marak aro PAC-ni advisor (Administrative) HM Shangpliang ong·a.
