TURA: Raksamgre Civil Sub-Division-ni ning·o donggipa Medhipara songo Bamboo Hub Industry ba wa·ani karkanako kulianiara, jolo songdongenggipa manderangna namgniko aro namroro silroroaniko ra·baani ong·gen ine ia jolrango donggipa dingtang dingtang NGO-rang, jolo songdongenggipa manderang aro Nokma-Sordarrang parakatenba, ia biapo wa·a karkanako kulina tik ka·ahani gimin a·dok sorkariko mittelpilataha.
Iani bidingo a·dokni Chief Minister Conrad K Sangma-na sedoatengon, ia wa·a karkanako kulina tik ka·gimin biapara Garo Hills Autonomous District Council (GHADC)-ni ning·o ga·akgipa biaprangsa ong·a indiba skangonin Assam a·dokni manderang, ia biaprango niam gri ro·ong quarry, sawmill-rangko chalaian baksana rubber baganrangko daktokaha ine Raksamgre jolo donggipa dingtang dingtang dolrang parakataha.
“Adita salrangna skangsan ia biaprango niam gri ka·enggipa kamrangko district administration champengatna man·ahachim indiba Assam-ni mitam manderang, niam gri a·arangko bree, ia biaprango napdrana jotton ka·aha. Ia biapo wa·a karkanako kulianichi, iandake niam gri napdrae bagan dakanirangko champengna aro Tribal-rangni a·arangko chel·chakna man·gen,” ine jolni NGO-rang parakataha.
Ia biapo wa·ani karkanako kuligenchimode, ian mikkangchi Assam-oni napsrukbaenggiparangko champengsoani mingsa namgipa chol ong·gnok aro napsrukbaenggipa manderangko champengsoasan ong·aigija ia karkanao A·chik a·songni manderangba sak 5000-na baten kamrangko ka·e cha·pana cholrangko man·gnok ineba NGO-rang parakataha.
Ia biapo wa·a karkanako kulianichi, ia biapona rama jal·lang aro dingtang dingtang cholrangko ra·bae, ia jolrango namroro silroroaniko ra·bana man·gnok ineba NGO-rang parakataha.
