PA Sangma Stadium mikkango chue tarigipa a·songni nisanko CM songe on·a

TURA: Tura-ni Dakopgre-o donggipa PA Sangma Sports Complex mikkango, metre 40 ong·e chugipa a·songni nisanko Mongolbar salo, a·dokni Chief Minister Conrad K Sangma-ni jakchi songe on·angaha.
Ia feet 30×45 ong·gipa a·songni nisanko Meghalaya sorkarini Urban Affairs department jako ra·e tariaha.
PA Sangma Sports Complex mikkango ia chue tarigipa a·songni nisanko songe on·anganio a·dokni Chief Minister, tom·anio bak ra·giparangna aganprakangengon, ia nisanko songe on·na man·ahani gimin an·tangni kusi ong·aniko parakangenba, ia nisanara a·songo songdongenggipa manderangni mikkim rasong, ku·mong nangrimani aro jakgitel ong·aniko mesokani ong·a aro ia nisanko songanichi, a·songna mande ra·aniko mesokani ong·a ine parakataha.
A·songni nisanko iandake chue songdogipa biaprangoni Meghalaya a·doko Tura jillaan gnigipa ong·e ine janapatengon, bakan ia apsan dakgipa nisanrangko a·dokni gipin a·jarangoba, mongsongbate district headquarter-rango songgen ine Chief Minister parakataha.
Tura jillako nitobatatna gita a·dok sorkari, dingtang dingtang program-rangko a·bachengataha ine janapatengon, “Tura jillako nitobatatani gnigipa bakko bakan a·bachenggnok aro ia gnigipa bako Tura Bazar jolrango street light-rangko, ramarangko aro Tura Super Market-ko taridapna gita gong kror 16 tangkarangko sorkari chamataha,” ine Sangma aganaha.
Tura jillako nitobatatani gittamgipa bako, Tura Araimile (Goanang) bibraoni PA Sangma Road bon·aona kingkingan, dingtang dingtang biaprangko taridapgen ineba Sangma parakataha.
‘Paint My City’ campaign-ko ka·angkuanio, dingtang dingtang building-rangko, pakmarangko aro retaining wall-rangko rongrangchi nongdapanggen ine janapatskaengon, ia kamo bakrimaniko on·china gita a·dokni Chief Minister, jolo songdongenggipa manderangko didiangaha.
Dakopgre jolrango matchotgimin aro ka·enggipa kamrangni gimin janapangskaengon, “Tura jillao Dakopgre-ara namen mongsonggipa biap damsa ong·a aro ia jolrango bang·en namdapatani kamrangko ka·enga. Ia jolo additional secretariat-ko rikani kamrang a·bachengengaha aro re·anggipa antio nokdonggae on·anggipa MPSC building-ni sambao, dingtang dingtang tom·anirangko ong·atchakna gita Convention Centre-ko rikengaha,” ine Chief Minister aganaha.
Gitcham Orchid Hotel dakgipa biapo bakan Tura-o skanggipa Five-Star Hotel-ko Hilton Group kulignok aro ia hotel-ko bilsignini gisepon matchotna ka·dongenga ineba Chief Minister parakataha.
2027 bilsio sokachakna sienggipa National Games-na dingtang dingtang stadium-rangko ta·raken rikengaha ineba ua aganaha.
Ia PA Sangma Sports Complex-o a·songni nisanko songdoe on·anio, West Garo Hills a·jani Deputy Commissioner Vibhor Aggarwal, Superintendent of Police (SP) Abraham T Sangma, Tura Municipal Board-ni Chairman JD Sangma aro dingtang dingtang official-rangba dongpae bak ra·angaha.