TURA: West Garo Hills a·jani Rengsrangre Songma songo, bijoliko man·chengaoni da·o bilsi 45 batpilengahaoba, bolni bijoli krongrangkosa jakkalkuenga aro ian songni nokni manderangna aro pilak janggi gnangrangna kenchakna nangani ong·enga ine jolo songdongenggipa manderangni pal, Asananggre songni saksa Flaming B Marak parakataha.
Marak-ni parakatani gitade, ia songna 1980 bilsion MeECL, bijoliko sale on·chengaha aro untalan ia songni manderang, maming neng·nikani grian bijoliko man·tokengachim.
Indake ong·genchimoba, ia songna bijoliko on·chengaoni da·alona kingkingan bijoli krongna silni krongrangko jakkalani pal bolni krongkosa jakkalengani a·sel ian songni nokni manderangna aro pilak janggi gnanggiparangnan kenchakna nangani ong·enga ine Marak parakataha.
“2022-2023 bilsirango, Ram Singh-ni West Garo Hills a·jao Deputy Commissioner ong·e kamko ka·engmiting somoio, ia songna bijolini krongrangko boodle, silni krongrangko on·skachina songni manderang, uko mol·moleaha aro ua, manderangni dabia gitan, songona re·ange nienba, ia songo silni bijoli krongrangko songe on·china MeECL-ni Executive Engineer-ko ge·etahachim. Indake ong·genchimoba, MeECL-ni Executive Engineer, DC-ni ge·etaniko knachakjaha aro ia songo silni bijoli krongrangko on·chipjaha,” ine Marak parakataha.
Ia songni manderang, bijoliko man·chengaonin bijolini kajinarangkoba nanga gitan gamtokpaengachim ine janapatengon, ia songo maming dal·a a·selrang ong·na skangan, bolni bijoli krongrangko ra·galenba, silni krongrangko songskachina gita Marak, MeECL-ko didiataha.
WGH-ni song damsao bolni bijoli krongko jakkalkuenga ine matnanga
Date:
Share post:
