TURA: South Garo Hills a·jani Chokpot jolo donggipa Paromgre songo, a·ningni ma·manti gamrangko niam gri bikotenga ine matnangtokengon, Paromgre songo aro Garo Hills-ni gipin biaprangoba iandake gamchatgipa a·ningni gamrangko skatang bikotjachina aro bikotanirangko dontongchina NGCO dabiangaha.
Garo Hills-o iandake a·ningni gamrangko skatang bikotaniara, Sixth Schedule-ni ning·o on·gimin niamrangko pe·ani gita ong·enga ine janapatengon, “Garo Hills-ni dingtang dingtang biaprango niam gri ro·ong bikotanirangko chinga raken jegalenga. Iandake Garo Hills-o donggipa a·ningni gamrangko bikotaniara, Indian Constitution-ni Sixth Schedule ning·o on·gimin niamrangko pe·ani gita ong·enga aro iako Garo Hills-ni pilak biaprangon manderang jegaltokenga,” ine NGCO parakataha.
Garo Hills Autonomous District Council (GHADC) baksa agangrikchenggija aro permission ra·chenggija Sixth Schedule ning·o quarry permit-rangko on·aniara niamni a·palo ong·a ineba NGCO parakataha.
NGCO-ni parakatani gitade, General Administration Rules-o pangchake, GHADC-ni permission-ko man·chenggijade district council ning·o a·ningni gamrangko bikotna niamrang dongjachim.
A·dokni forest aro mining department-rang, Sixth Schedule-ni niamrangko ja·rikgija skatang quarry permit-rangko on·enga ine matnangatengon, “GHADC-ni permission gri, South Garo Hills a·jani Chokpot jolo donggipa Rongma Paromgre songo a·ningni bosturangko bikotna jotton ka·enganiko knasoe chinga namen suk ong·ja. Ia biaprango skatang a·ningni gamrangko bikotaniara Sixth Schedule, Mining Policy aro jatna on·gimin bil aro niamrangko pe·a ga·akenga,” ine NGCO parakataha.
GHADC-ni permission gri state department-rangni on·gipa quarry permit-rangchi Garo Hills-o a·ningni gam bikotaniko dontongchina gitaba NGCO dabiangaha.
