TURA: Adita salrangna skang, Garo Hills-ni Meghalaya State Government Employees (MSGE), a·dok gimikni Meghalaya State Government Employees Federation (MSGEF) baksa Tura-ni Mission Compound-o donggipa Working Women’s Hostel-o tom·aniko ong·atangenba, sorkario kam ka·giparangni dingtang dingtang nanganirangko chanchirimangaha.
Ia tom·anio dingtang dingtang department-rango kam ka·giparang, jekai Ministerial Staff, Primary skulo skigiparang, driver-rang, Grade-IV-ni gadango kam ka·giparang aro gipinrangba bak ra·angtokaha.
Ia tom·anio dolgni chanchirimengon, Old Pension Scheme-ko ra·gatpiltaichina, Compassionate Ground-o kam on·aniko ra·gatpiltaichina, medical allowance-ko bariatchina, promotion system-ko mongsongbate grade-IV employee-rangna 3rd Pay Commission-ni recommendation-o pangchake ja·rikchina, pilak biaprangon house rent allowance-ko apsan ong·e on·china, Leave Travel Consession, Scheduled Tribe (ST)-rangna kamo ra·ani bilsiko bilsi 37-ona ra·doatahani gimin neng·takani bilsiko bariatchina aro kamoni neng·takangengon Leave Salary-ko bariatchina gita sorkario dabiangaha.
Ia tom·anio, MSGEF-ni secretary general Bansharai Kharchandy, jinmana aganprakengon, adita salrangna skang uamangni sorkarina on·anggipa memorandum-ni bidingo mingprakprak talatanirangko on·angaha aro iarangni bidingo ja·mano jinma mingprakprak chanchirimangaha.
Bon·kamao, MSGEF Garo Hills Unit-ko Tura-o songna gita jinma tik ka·e donangaha.
