SHILLONG: National People’s Party (NPP)-chi dilenggipa Meghalaya Democratic Alliance (MDA)-II Cabinet-oniko ra·galani giminde gisik saja indiba ian mandeni chanchiani bewalosa pangchakaia ine Bristibar salo, a·dokni gitcham Cabinet Minister aro United Democratic Party (UDP)-ni MLA Paul Lyngdoh aganaha.
Iani bidingo talataniko on·china aganon, MDA-II Cabinet-ko sualpilna salbri skangsan party-ni foundation day-ko maniaha aro party-ni president an·tangan, Cabinet-ko sualpiltaina chanchia dongja ine media-na aganahani gimin ian maikai politics-o chanchianiko ja·rika, unosa pangchakaia ine Lyngdoh aganaha.
Lyngdoh-ni parakatani gitade, Cabinet-ko sualpiltaina jasa skangba party-ni dilgiparang, Cabinet-ko sualpiltaiani gimin sing·dotokaha maina ua somoio Cabinet-ko sualpilani ong·engahachim.
CEC-ni tom·aniko dilgipa party-ni president an·tangan Cabinet-ko sualpiltaina miksonganirang dongja ine aganahachim ineba UDP MLA parakataha.
“Uan anga mai gadangko jako ra·enga, uni giminde ong·ja indiba party-ni president-sa, Cabinet-ko sualpiltaina miksonganirang dongja inede aganaha,” ine Lyngdoh parakataha.
2028 bilsini Assembly election-na skang NPP-o napgenma ine sing·on, iani giminde ua mamingkoba aganna gita jechakskaaha.
Jasamangna skang, Cabinet-ko gital dake sualpiltaianio, sakchet Cabinet minister-rangko ra·galahani gimin bang·a manderangan aiao inmantokbeahachim.
Cabinet-oniko ra·galna skang maming u·iatanirangko on·chengjaha ine mitam gitcham minister-rangde matnangtokaha.
