SHILLONG: Adita salrangna skang ong·atanggipa Shillong Cherry Blossom Festival-ona gipin biaprangoni manderang bang·en sokbatokaha aro ia program namen chu·sokgipa ong·aha ine Bristibar salo, a·dokni Tourism Minister Timothy D Shira a·kangataha.
Ia Shillong Cherry Blossom Festival-ona badita sak manderang sokbaaha, iani giminde ua mamingkoba aganna gita man·skajaha.
Shillong songjinmani bijangchio ia manianiko ong·atani a·sel gari gorarang apchangket ong·atako man·aha aro walni somoio agre gam·atani a·sel manderang tuna cha·na man·tokjaha ine matnanganirangna aganchakaniko on·angengon, ia Cherry Blossom Festival-ko Shillong songjinmani a·palo ong·atna gita da·o biaprangko tariengaha ine Tourism Minister parakatskaaha.
“Ia chang Shillong Cherry Blossom Festival-ko JN Stadium gita dake namgipa biaprang dongani giminsa Shillong-o ong·ataha,” ine Shira talataniko on·angaha.
Me·gong Festival-ko ong·atani bidingo janapatskaengon, Williamnagar aro Jengjal-ni gisepo dingtang biapo iana tarisoengaha ine Tourism Minister parakataha.
“Ia biapon Me·gong Festival-ko bilsianti ong·atronggnok,” ine Shira aganenba, ia Me·gong Festival-onaba gipin a·songrangoniko git ring·gipa manderangko aro dolrangko rimbana jotton ka·enga ine parakataha.
Cherry Blossom Festival namen chu·sokaha ine Tourism Minister a·kanga
Date:
Share post:
