TURA: Chokpot Sub-Division-ni ning·o donggipa Paromgre songo, a·ningni gamrangko niam gri bikotaniko jegalgrimtokengon, adita salrangna skang ia jolo koela bikotenggipa ‘Sinthang Coal Block’-ni ma·manti ostrorangko nisie galaha aro kragija kamrangko ka·aha ine badiaba badiaba kobor on·timgiparangni matnangataniko Chokpot jolni dingtang dingtang NGO-rang raken jegalataha.
Chokpot jolo nangrimgimin dolrangni parakatani gitade, ia jolo koela bikotenggipa ostrorangko nisie gala aro kragija kamrangko ka·a ine matnanganiara maming pangchakani gri matnanganisan ong·aia.
“Chingni kosako iandake matnanganiara pangchakani gri, tol·e aro taridape matnanganisan ong·aia ine chinga talataniko on·na ska. Ia biapo koela bikotenggipa ostrorangko nisie galanio chinga an·tangtangba jak dongja aro nisie galchina didiaba dongja. Ian ia jolrango koela aro ma·manti a·ningni gamrangko bikotaniko chingni jegalengani gimin chingko ong·gija dake biming man·atna jotton ka·anisan ong·aia,” ine Chokpot jolni NGO-rang parakataha.
Ia jolrango niam gri a·ningni gamrangko bikotaniara samtangtango ong·telaigiparangna nangchakeaniko ra·baengani giminsa aro songo noko donggipa manderangni namgninasa uamang jegalanirangko dakenga ine talataniko on·angengon, iandake jegalanirangko dakengoba uamang pangnan aino pangchakesa, seachirangchi badi ka·esa, jinma agangrikanichisa, jinma tom·anirangko ong·atanichisa aro sorkarina seanirangchi badi ka·esa jegalanirangko dakronga ine NGO-rang parakataha.
“Chokpot-ni NGO-rang maming saloba iandake so·sojengjeng ong·atanirangchi jegalanirangko dakja aro iandake chingni kosako matnanganiara chingni indita bilsirangna namgipa bimingko man·a tikkelaniko nosto ka·ani gita ong·aha,” ine Chokpot jolni nangrimgimin NGO-rang parakataha.
Koela bikotenggipa biaprangko sandirokani ja·man dingtang dingtang dolrangni ku·pattie on·anirangko bilo ong·enggipa official-rang ja·rikjaha ineba NGO-rang, suk ong·gijaniko parakataha.
