Rongtal an·talaniko rakkichina Marcuise didia
WILLIAMNAGAR: East Garo Hills a·jani headquarter Williamnagar jillao be·en aro na·tok pale cha·giparangna gital rike on·gipa nokko Sukrobar salo, a·dokni PHE Minister aro Williamnagar-ni MLA Marcuise N Marak nokdonggae on·angaha aro ia nokko nokdonggae on·anio, East Garo Hills a·jani Deputy Commissioner RP Marak, Superintendent of Police (SP) Stephen Rynjah, ADC-rang, gipin sorkari official-rang aro jolo songdongenggipa manderangba bak ra·angtokaha.
Ia be·en aro na·tok palchakgipa nokko nokdonggae on·anganio a·dokni PHE Minister, jinmana aganprakangengon, nokko rike on·anichi Williamnagar jillao be·en aro na·tok palgiparang, an·tangtangni bosturangko rongtalbate aro nambate palna sim·na cholko man·gnok ine parakatenba, Williamnagar jillao be·en aro na·tok pale cha·enggipa manderangni namgnina ia nokko rike on·ahani gimin Williamnagar Municipal Board (WMB)-ni Chief Executive Officer Ripamchi N Sangma aro Chairman BK Sangma-ko mittelpilangaha.
Williamnagar-o me·su samjak pale cha·enggiparangnaba sorkari, bakan dingtang nokko rike on·na miksongenga ineba Marak parakataha.
Williamnagar-o be·en den·chakgipa nokkoba rike on·na biapko sandimanaha ine janapatskaengon, ia biapko rongtal an·tale rakkichina aro jabolko galanio Williamnagar Muncipal Board baksa bakrimchina Marak didiangaha.
Ia be·en palchakani nok baksana Williamnagar Muncipal Board-ni extension office building-ko nokdonggae on·anio, East Garo Hills a·jani Deputy Commissioner RP Marak, Superintendent of Police (SP) Stephen Rynjah aro gipinrangba aganprakangaha.
