TURA: Assam-oni sak 5 kam ka·giparang jemangan Tura-oni adit chel·kalgipa Bokmagre song sepango a·a cho·ani kamrangko ka·engachim rang·gitik a·a ru·rongdapanichi sakgni kam ka·enggiparango a·a pe·dapa man·e siaha.
Ia a·sel Bristibar pringo ong·aha, uni ja·man a·selo ga·akgipa nokdangni manderang Araimile Aoutpost-o FIR ka·angaha aro ia a·selni bidingo a·a nokgipa jean Tura Dakopgre-o dongenggipa Saljrang D Sangma aro sub-contractor Anowar Hussain jean Assam-ni South Salmara-o donggipani kosako ge-gipin FIR-ko ka·angaha.
Shahjol Hoque a·a ri·rongdapgipa biapon siaha aro sakgipin Zinarul Islam uni jokkom ong·anina Tura Civil hospital-o sanna bannaniko dakengmiting somoio siaha.
Jokkom ong·gipa manderangara Zakirul Islam, Md Mozidul Hoque aro Sohidur Rohman ong·a ine police parakataha.
Kam ka·e cha·gipa gimikan Assam, South Salmara-oni ong·a.
Kam ka·enggiparango kosakoni a·a ru·rongdapani ja·man a·a dapako man·aha, uamang ua somoi mitingo retaining wall gital tarigipani kosako section-rangni gita uamang a·ako cho·angengachim.
Joltangni police, SDRF aro DDMA-oni sipairang baksa a·a ru·rongdapa man·gipa manderangko naljokatna man·aha.
Uamangoni sakgnide a·a ning·tubate bedapaniko man·e siaha aro uamangko ja·mano a·a ru·rongdapaoni salongkatna man·aha.
Ia a·selni bidingo police am·sandianiko dakangenga ine parakataha.
