TURA: East Garo Hills a·jao ramarangko tariengon, rama tariani ma·manti jabolrangko Norek chiringo galengani a·sel ia moilarang, Simsang chibimaonaba jokangenga ine United A·chik Socio Economic Justice Forum (UASEJF), NHIDCL-ni kosako Meghalaya State Pollution Control Board (MSPCB)-na badi ka·doangaha.
UASEJF dolni badi ka·doangani gitade, NH-127B ramako tarianio Premson Private Limited aro NHIDCL, a·a, a·dubek aro rama tariani ma·manti jabolrangko, ia ramasamo donggipa Norek chiringona galatengani gimin ia samtangtango ong·telaigiparangko chel·chakna dongimin niamrangko pe·ani gita ong·enga.
“Ia jolrango songdongenggipa dingtang dingtang songni manderang, Norek chiringonikon ringna aro dingtang kamrangnaba jakkaltokpaenga indiba NH-127B ramako tarienggipa manderang, simsakgija jabolrangko galengani a·sel ia chiring moila ong·atako man·e, songni nokni manderang neng·nikanirangko chagrongna nangtokenga,” ine UASEJF-ni president Dimchrang Dwarka M Sangma parakataha.
Ia Norek chiringara Garo Hills-o mongsongbatgipa chibimarangoni dilsa Simsang chibimaona jokangenggipa chiringan ong·a ine janapatskaengon, rama tariani ma·manti jabolrangko ia chiringo galengani a·sel moilarang Simsang chibimaonaba jokangenga aro ian mandenasan ong·aigija chio donggipa jonturangna aro samtangtango ong·telaigiparangnaba nangchakeaniko ra·baenga ine UASEJF-ni president parakataha.
Ia ramako tarienggipa company aro NHIDCL, Environmental (Protection) Act, 1986, aro Water (Prevention and Control of Pollution) Act, 1974-o on·gimin niamrangko pe·aha ine janapatskaengon, ia ramako tarienggipa company aro NHIDCL-ni kosako rakgipa ja·kurangko de·china UASEJF, MSPCB-ko didiataha.
