Baljek Airport-ko UDAN scheme-o chapatchina didia
SHILLONG: Sombar salo, Meghalaya a·dokni Chief Minister Conrad K Sangma, Union Aviation Minister K Rammohan Naidu-ko New Delhi-o grongenba, a·dokni airport-rangko chalaiani bidingo agangrikangaha.
Union Aviation Minister baksa agangrikengon, Shillong Airport-ko dal·batatna miksongenggipa bidingo a·dokni Chief Minister, talate on·angenba, ia airport-ko dal·batatanio dakchakanirangko on·china Naidu-ko didiangaha.
Jengjal-o donggipa Baljek Airport-ko ta·raken a·bachengna man·na gita ia airport-ko ma·mong sorkarini UDAN scheme-o chapatchina gitaba Chief Minister, Union Aviation Minister-ko didiangaha.
“Union Aviation Minister K Rammohan Naidu-ko grongenba, Shillong airport-ko dal·batatna aro Baljek Airport-ko RCS-UDAN scheme-o chapatchina gita mol·molangaha,” ine Sangma, social media-o parakataha.
A·dokni airport-rangko nambatatna gita ku·rachakaniko on·ahani gimin Union Minister-ko mittelpilna ska ineba Chief Minister parakataha.
Shillong airport-ko dal·batatani aro a·dokni gipin airport-rangko a·bachengataniara a·dokni tourism economy-ko tang·doatna gita namen nangchongmotgipa ong·a ine Naidu aganaha.
“Meghalaya a·dokni airport-rangko namdapatani bidingo Chief Minister Conrad Sangma baksa tale agangrikaha. Airport-rangko nambatatanichi, a·dokni tourism aro dingtang dingtang kamrangko tang·doatna man·a,” ine Union Aviation Minister, an·tangni social media platform-o parakatskaaha.
