SHILLONG: Special Intensive Revision (SIR)-ko dakengani a·sel West Bengal aro Assam a·dokrangoni mitam manderang, Meghalaya a·doko katnapna jotton ka·enga ine Confederation of Meghalaya Social Organisations (CoMSO) parakatenba, gipin a·dokrangoni niam gri napsrukaniko mikrakbate nirokchina a·dok sorkariko didiataha.
CoMSO-ni chairman Roy Kupar Synrem-ni parakatani gitade, ia sal somoirango a·songni bang·bata biaprangon electoral roll-rangko nipilna aro niam gri biming segatgiparangko den·galna SIR-ko dakengani gimin West Bengal aro Assam a·dokrangoni mitam manderang, Meghalaya a·doko katnapna jotton ka·skaenga.
“Uni gimin SIR-ko matchotkujaskal, Meghalaya a·dokona re·baenggipa manderangna rakgipa niamrangko donchina aro gipin biaprangoni re·baenggipa manderangko biming segatna nangtelgipa ong·atchina chinga, a·dok sorkario dabienga,” ine CoMSO-ni chairman parakataha.
A·dokni mongsonggipa cholgugarango, police aro district administration-ni official-rangko donatenba, dongimin niam retirango pangchake, a·dokona re·baenggipa manderangko name sandirokatchina gitaba CoMSO dabiangaha.
A·dokni pilak simarangon mikrake dongna aro nambate nirikkianirangko dakna gita a·jatangtangni deputy commissioner aro superintendent of police-rangna, simako nirokenggipa dingtang dingtang dolrangna aro sima jolrango donggipa dingtang dingtang songrangna ge·etaniko on·china gitaba CoMSO, a·dok sorkariko didiataha.
Gipin a·dokrangoni niam gri napsrukanirangchi a·doko songdongenggipa Tribal-rangna aro niam retirangko rakkianioba nangchakeaniko man·gen ineba ua mikrakataniko on·angaha.
“Iandakgipa obostao maming ja·kurangko de·gija donggenchimode, mikkangchi a·doko songdongenggipa manderangna nangchakeaniko ra·baan baksana niam retiko rakkianio aro sorkariko chalaianioba nangchakeaniko ra·banaba gnang,” ine CoMSO-ni chairman, a·dok sorkarina mikrakataniko on·angaha.
