SHILLONG: MLA scheme-rangko nama bewalo aro jinmana parak ong·e chu·sokatchina gita United Democratic Party (UDP), MLA-rangko didiangaha.
“MLA scheme-rangko jakkalsretenga ba kolgapgijanirang donga ine manderang nikenga ong·ode inquiry dakchina chinga nangnika,” ine UDP-ni president Metbah Lyngdoh, kobor ra·timgiparangna aganaha.
Opposition MLA-rangni constituency-rango MLA scheme-rangko chu·sokatenga chu·sokatjaenga, uarangko ma·sie ra·na gita manderang, RTI ka·e am·sandina nanga ine adita salrangna skang, a·dokni Chief Minister Conrad K Sangma aganahani gimin UDP-ni president, ia kattarangko aganskaaha.
Gipin political dolrangni chanchiani bidingo aganna gita jechakangengon, ua an·tangde Mairang constituency-ni MLA ong·e, an·tangna tikatgimin MLA scheme-ko pilaknan sokatna gita jotton ka·ronga ine Lyngdoh aganaha.
“Manderangna dangdike on·giparang ong·e an·ching pilakan chu·sokgijanirangde dongaia indiba an·ching maming saloba scheme-rangko jakkalsretna ba manderangna jechakna nangja,” ineba ua aganaha.
“Darang MLA-an name chu·sokata inede a·kangna man·jawa. MLA scheme-ko chu·sokatna gita an·ching songni nokni dilgiparang, chadamberang aro me·chik dolrangni ku·pattianirango pangchakronga. Scheme-ko chu·sokatanio dongnuani dongna gita nangja,” ine UDP president aganaha.
GHADC election-ni bidingo janapatskaengon, ia election-o susana gita da·o dipet party name tik ka·kuja ine Lyngdoh parakataha.
GHADC election-o UDP-na chol namama namja da·o dipet party-ni special committee, name nipiltaikuenga aro committee-ni report-ko man·ani ja·mansa GHADC election-o susagenma susajawa ukode tik ka·gen ine Lyngdoh parakataha.
“Cholrangko nina gita chinga Garo Hills-ni dilgiparangchi committee-ko songaha aro ia committee-ni report-ko man·ani ja·mansa election-o susaani giminde chanchitaigen,” ine UDP president aganaha.
