TURA: Re·baenggipa 2026 bilsini a·bachengachibara ong·atna sienggipa Garo Hills Autonomous District Council (GHADC) election-na skangan dingtang electoral roll-ko ra·gate on·china dabie A·chik State People’s Front (ASPF), Sombar sal dipet poster campaign-ko a·bachengatangaha.
ASPF-ni chief organizing secretary Raksim Marak-ni parakatani gitade, GHADC-ara Sixth Schedule-ni ning·o Tribal-rangni a·a-chia niam reti aro sasonni bidingo chel·chakna aro ripingna on·gipa bil ong·a aro ia district council-o gipin jatrang, mongsongbate Tribal ong·gijagipa manderangni bak ra·paaniara, niamni a·palo ong·enga.
“Chinga Non-Tribalrangni GHADC election-o candidate ong·ani aro bakko ra·aniko raken jegalenga maina Sixth Schedule Tribal-rangni a·a chia niam reti aro sasoni bidingo chel·chakna aro ripingna on·gipa bil ong·a unigimin Non Tribal-rangni candidate ong·ani aro vote on·aniara Sixth Schedule-ni dongimin niamrangming bikpil ong·a. Chinga uamangni GHADC election-o bak ra·aniko champengna gita Separate Electoral Roll-ko ra·gate on·china GHADC-ko chalaienggipa Executive Committee-ko mol·molatenga,” ine ASPF-ni chief organizing secretary parakataha.
Iani bidingo ASPF-ni dilgiparang, re·anggipa November-ni 17 tariko GHADC-ni Deputy CEM Nikman Marak aro Executive Membor Stevie Marak-ko gronge, uamangni jako memorundumko on·aha aro apsan daken ASPF-ni dilgiparang, Separate Electoral Roll aro dingtang dingtang issue-rangko ra·e Meghalaya Governor-koba gronge memorandum-ko on·aha ineba ua parakataha.
GHADC election-o Tribal ong·gijagipa manderangni bak ra·aniko ASPF raken jegalangkugen aro iani bidingo dingtangmancha poster campaign-ko a·bachengataha ine janapatengon, “Iani ja·man ASPF-ni membor-rang, A·chik a·songni kona noksikona re·e jatko de·mesana aro ku·rang ku·cholsan ong·e jegalna gita public meeting-rangko ong·atgen aro sit in demonstration-koba chinga permission man·joko ong·atgen,” ine ASPF-ni chief organizing secretary parakataha.
