Tribal Research Institute-ni bidingo TOT company-ko NGCO matnanga

TURA: Tura songjinmaoni kilometer 30-mang chel·ao donggipa Chidekgre songo, Tribal Research Institute-ko rika matchotchipkujaengani gimin ia institute-ko rikenggipa TOT company-ko Niksamso Garo Community Organisation (NGCO) matnangataha.
NGCO-ni parakatani gitade, ia Tribal Research Institute-ko bilsi bongana skangan rikna a·bachengahachim indiba da·alonan ia institute-ko matchotchipgija donaienga.
“Ia Tribal Research Institute-ko matchotchipgija donengani a·selan ia nangchongmotgipa project-ko indin galchipe dona gita ong·engaha. Ia institute-ko rikna gita indita tangka paisarangko chame on·aha aro changni changni ku·rachakaniko on·ahaoba da·onan matchotchipkujaenga,” ine NGCO-ni president Tengrak Marak parakataha.
Chidekgre-o rikenggipa Tribal Research Institute-ko matchotningjaengani gimin aro kamko name gisiko nanga ka·jaengani gimin batanggimin somoirangoba NGCO, changni chang lekkarangko sedoatahachim ine nikna man·a.
“Indita chang manderangni badi ka·anirangko man·ani ja·manba ia biapo maming dingtanganiko nikna man·kujaenga aro a·dok sorkarini gitaba contractor-ni kosako maming ja·kurangko de·jaenga. Ian manderangni gisepo sing·dona nanganiko ong·atenga,” ine NGCO-ni president matnangataha.
Marak-ni parakatani gitade, ia apsan company-an Sakal Aduma songoba eco-tourism project-ko matchotchipgija donaiahachim.
“Iandake Garo Hills-ni mongsonggipa project-rangko chu·sokatjaenganiara ia company-ni kamo gisik nanggijaniko aro Garo Hills-ni manderangna ku·rachakanirangko pe·ani aro mesokani ong·enga. Mikkangchi ia TOT company-na Garo Hills-o maming kamrangkon ka·na on·jachinaha,” ine NGCO parakataha.
Babadam-o Tribal Research Institute aro Sakal Aduma-o Eco-Tourism Project-ko rikna gita ia TOT company-na on·gimin contract-rangko den·galpilchina gitaba NGCO, a·dok sorkario dabiangaha.
Ia dabianirangko sorkari knachakja ong·ode gipin dolrang baksa nangrime aro niamo pangchake jingjengatanirangko dakanggen ineba NGCO, mikrakataniko on·angaha.