GHADC poll-o gipin jatrangna party ticket-rangko on·jachina CRF mol·mola

TURA: Re·baenggipa bilsio GHADC election ong·na am·enggipao gipin jatrangna party ticket-rangko on·jachina a·dokni pilak party-rangko Constitutional Rights Forum (CRF) mol·molangaha.
“Songdonggipani chanchina nanggipa ong·e, GHADC-na MDC election ong·na am·enggipao gipin jatrangni bak ra·ako chinga raken jegala. Gipin jatrangna party ticket on·ako dondipatchina na·simangni party gimikna ge·taniko on·china chinga mol·mola aro uamangni bak ra·aniko jegala.,’ ine CRF aganaha, dingtangmancha mongsonggipa party-rang jekai NPP, INC, UDP, TMC, NCP aro gipin party-rangna mol·molaniko on·e aganangaha.
Forum-ni parakatani gitade, GHADC ian tribal jatrangna dingtangmanchagipa institution ong·a aro gipin jatrang bak ra·e uamangni bilrangko aro an·tangtangni namgnina jakkala.
“Constitution of India-ni Article 244(1) aro 275(1)-o parakatani gitade, GHADC, a·jao Scheduled Tribes (STs)-ni songsalko, badingchiwalani aro jatni dakbewalrangko tang·doatna nang·telgipa ong·a. Paragraph2(1)-ni ning·o Sixth Scheduled, GHADC-ko man·chape Autonomous District Council-rangna on·gipa mande ra·an baksa niamrangko tarina bil donga, kam ka·ani, ba a·a jakkalani aro a·ba owe cha·aniko ranta ka·jringna aro gipinrangko on·a. Rule 3(1)-ni ning·o Garo Hills Autonomous District Council (Constitution and Administration of Justice) Rule, 1983-o indake agana, GHADC-o sak 30 membor-rang dongna nanga, jemangkon Garo Hills a·jaoni manderangchi sak 29-ko seokna nanga aro saksa membor-ko Meghalaya sorkarini gita namnike ra·chakna man·a,” ine uamang aganaha.
West Garo Hills-ni Phulbari-oni dolrang, gipin jatrangna party ticket-rangko on·angaoniko ra·pilchina pilak party party-rangko mol·molangaha.
GSU, ASPF, FKJGP, AHAM, GOERA, ADIL, GSMC, AAYF, AYWO aro AAYWS dolrang apsan nangrime Bristibar salo political party-rangna mol·molanganiko media-o parakangaha.
“Sixth Schedule-o rongtale paraka, GHADC -ko tribal jatrang an·tangtang sorkarina rikna man·a. GHADC, tribal an·tangan niam tarina, jakgitele sorkari rikna aro chel·chakna man·gipa kol ong·a. Meligrikaniona re·bagija ia niamrangko political party-rang mande ra·na nangchongmota. Gipin jatrangna ticket-rangko on·anganide Sixyh Scheduled-ni gisik aro chitti kingantini kosako chakatgipa ong·anggen aro mikkangchina kenchaksoanirangko ra·bagipa ong·anggen,” ine  uamang agandapangaha.