Phulbari-o niamgri kuligipa cashew mill-rang manderangko neng·nikatenga matnanga

Phulbari: Phulbari-o komibeoba ge-3 cashew mill-rangko niamgri chalaigiparang donga, uarangni a·sel ua jolni manderang rang·sitna nang·nikaniko man·engaha.
Ge·gni mill-rangko Milonpur jolo chalaienga ro ge·gipinko Naga Bund-o maming lekka chu·onga grian ru·uta bilsirangna chalaiengaha aro ua biapo manderang changketpile dongenga, ine jolni manderang parakataha.
“Ua biapo bang·a hajal manderang sera bera dake dongenggipaon uamang mill-ko chalaienga aro unon dongaba dongenga. Ian bilongen sepang jolo dongenggipa manderangna neng·nikaniko ra·baa. Karnaka-oni jokgipa namgijagipa balwani a·sel da·ode manderang rang·sitnaba neng·nikaniko man·engaha,” ine Milonpur-oni saksa mande aganangaha.
Aro sepang jolo donggipa pokkrirango na·tok jile cha·giparangba siengaha.
Mill-ko uno dongggipa sakgittam manderangchi chalaienga Khalil miya, Shamsuddin aro Aminur ong·a aro salantion bang·a ritcha kam ka·e cha·giparang donga. Karnakanako bilsi gimikan chalaia jeon songdonggipa manderangna namgijagipa balwani a·sel da·ode rangsitnarangan neng·nikengaha.
“Ia ge·gittam mill-rangni dongako darangan ma·sia indiba darangba simsakanina ja·ku de·gipa dongja. Iani bidingo chinga changni chang matnangatanirangko dakahachim. Ia ka·sine so·otenggipako chinga baditana chakna nangkugen jean chingni kosako drae dakenga,” ine sakgipin aganangaha.
Jensalo mill-rangko chalaia mongsongbate attamo balwarango karkana-oni namgijagipa acid gnanggipa balwako ong·katatenga, jean rang·sitanio nang·nikaniko ra·baa.
Iarangni bidingo industry department-na u·iatahachim indiba ja·ku de·na ba wene nibaa mangmangba dongja. Maia ong·pilenga, ia karkanarang apsan domestic electric line-rangko salanti business-na uamang sale jakkalenga.
“Iarang niamni gita chalaienggipa karkana ong·ode uamang an·tangtango transformer-rang dongna nanga? Uamang chingni transformer-ko jakkalenga aro agre dugapile bijoli jakkalanichi changni chang nosto ong·ataona sokatenga. Chinga karnakako namnikja ong·ja indiba ia balwako namgija ong·katatenggipa karkanarangko manderangni songdonggipa biaponi chel·kalaosa chalaina on·a nangachim,” ine sakgipin aganangaha.
Ia karkanarangko gipin biapona uamang jitangna nangenga aro niamni gita lekkarang baksa chalaina nangenga.
“Bang·a biaprang donga jerangan mande songdonggipa biaponi chel·a, uarangkon indakgipa mill-rangko chalaina jakkalna man·genchim. Maina iano jeon sakantian neng·nikaniko man·enga? A·dok sorkari aro district administration iani bidingo niatna nangenga aro kamko ka·angna nangenga,” ine sakgipin aganangaha.