TURA: Social media-o an·tangko ‘Duplicate Tribal’ ine seahani gimin Balachanda-ni gitcham MDC Sofiur Rehman-ni kosako Tura-ni MDC aro Bharatiya Janata Party (BJP)-ni state vice president Bernard N Marak, Scheduled Castes & Scheduled Tribes (Prevention of Atrocities) Act, 1989-ni ning·o FIR ka·doangaha.
Koborko on·ani gitade, Balachanda-ni gitcham MDC Sofiur Rehman, Tura-ni MDC Bernard N Marak-ko, social media comment-o ‘Ka·sara Dada na·aba duplicate Scheduled Tribe (ST)-an ong·a’ ine matnangatahachim.
An·tangko ‘Duplicate ba tol·gipa Tribal’ ine seatanina jegalatengon, ua saksa seokako man·gipa Member of District Council (MDC) aro ST jatni membor saksa ong·ani gimin iandake social media-o seataniara uko ‘ka·mikkenatani, chonnikani aro jat basee’ aganani gita ong·aha ine Marak parakataha.
“Angni ST gadangko ‘tol·gipa’ ine matnanganichi ia mande, angni kosako ka·mikkenatani, chonnikani aro jat baseaniko mesokani gita ong·aha aro Sixth Schedule a·jao Tribal ong·gijagipa mande saksani iandake kamko mesokaniara, SC/ST Act-ni ning·o sastiko man·ani ong·a,” ine Tura MDC parakataha.
Marak-ni parakatani gitade, ia gitcham MDC Sofiur Rehman-ni social media-o iandake uni kosako matnanganiara ian skanggipa chang ong·ja maina ua batanggimin somoirangoba apsan daken uni kosako matnangna aro ka·mikkenatanirangko dakna jotton ka·ahachim.
Iani bidingo FIR-ko segatenba, ta·raken sandirokaniko a·bachengatchina aro ia gitcham MDC kosako rakgipa ja·kurangko de·china gitaba Marak, FIR-o didiataha.
