SHILLONG: Meghalaya a·doko pass ka·ani percentage-ko tang·doatna gita a·dok sorkarini a·bachengatgipa CM IMPACT Guidebook-ko matnangtokengon, ia guidebook-kode textbook dake jakkalna miksonge taria ong·ja indiba textbook-rang baksana dakchakanirangko ra·dapna tariasan ong·aia ine a·dokni Education Minister Lahkmen Rymbui talataniko on·angaha.
Rymbui-ni aganani gitade, CM Impact guidebook-ara chatro chatrirangni poraianiko nosto ka·gen ine dingtang dingtang dolrangni agananiara dilsretani ong·enga maina ia guidebook-ko sorkari, textbook dake jakkalna ong·ja indiba gipin ki·taprang baksa dakchakanirangko ra·dapna miksonge tariasan ong·aia.
Chatro chatrirangna dongimin textbook-rango pilak nanga subject-rang, jekai Mathematics-ko formula-rang baksa, Language textbook-rangko golporang baksa, English Literature text-rang, grammr, essay, health education aro gipin subject-rangkoba dongimin curriculum-rang baksa tarimanaha ineba ua aganaha.
Ia ki·taprangkosa skigiparang skie on·na aro chatro chatrirang skie ra·na jakkalrongenga ineba Education Minister talataniko on·angaha.
CM Impact guidebook-de, chatro chatrirangni textbook-rangoniko skie ra·ani ja·man, chatro chatrirangni poraianio dakchake on·na miksonge tarigipa ki·tapsan ong·aia ine Rymbui parakataha.
Ia bilsini SSLC porikkao chatro chatrirang bang·bate pass ka·ahani gimin dingtang dingtang dolrang, CM Impact Guidebook-rangko ra·gatanina sorkariko matnangtokengachim ine nikna man·a.
