SHILLONG: Meghalaya a·doko niam gri napsruke songdong a·chaaniko champengna gita Inner Line Permit (ILP)-ko ra·gatani bidingo ma·mong sorkari, da·alonan maming ku·rangko on·chipkujaengani gimin Khasi Students Union (KSU), suk ong·gijaniko parakataha.
KSU Laban circle-ni bilsi 30 gapaniko manianio KSU-ni president Lambokstar Marngar, KSU-ni membor-rangna aganprakangengon, Meghalaya Legislative Assembly-o ILP-na 2019 bilsini December 19 tarikon resolution-ko ra·manahaoba da·alonan ma·mong sorkari, maming aganchakanirangko on·kujaenga ine parakataha.
Meghalaya Residents Safety & Security Act (MRSSA)-ko ra·gatningjaengani giminba KSU-ni president, sorkariko sing·doataha.
Meghalaya a·dokona niam gri napsrukbae songdong a·chaaniko champengna gita ta·raken ILP aro MRSSA-ko jakkalna nangchongmotengaha ineba ua aganaha.
Khasi manderangni naljokgnina KSU-ni pilak unit-rangko aro Khasi chadamberangko pangnan mikrake kam ka·china gitaba Marngar didiangaha.
“Hai an·ching an·tangni a·songko chel·chakna gita pangnan mikrake dongna,” ine KSU-ni president, ku·monganiko on·angaha.
Ia tom·anio, KSU Laban circle-ni president Reuben Najiar-ba aganprakengon, a·doko songdongenggipa Tribal-rangni bilrangko warachakna nangengani gimin aro chadamberangna kam ka·e cha·ani cholrangko on·na nangengani gimin aganangaha.
Bang·a changon bangbang ong·e donggipa kamrangko jinmana parakgija donchipronga aro ia kamrangko ja·mano, politics-o bak ong·gipa manderangnasa on·rongani a·sel a·dokni chadamberang, kamrangko man·rongpajaenga ineba ua aganaha.
Khasi chadamberangna cholrangko man·e on·na gita KSU dakgrikangkugen aro je kamrangkon chu·sokatkujaengachim, ua kamrangko chu·sokatna gita tikkele kamko ka·angkugen ineba KSU Laban circle-ni president parakataha.
Ia program-ko ong·atanio, dingtang dingtang porikkarangko teng·sugipa chatro chatrirangna aro kal·susaanirango chu·sokgipa chadamberangnaba mande ra·pilskaaniko dakangjolaha.
