TURA: Re·baenggipa December 5 aro 6 tarikrango salgnina West Garo Hills a·jani Bolbokgre aro Watregre songo ong·atna sienggipa Me·gong Festival-na tarisamsoanirangko a·dokni Tourism Minister Timothy D Shira niangaha.
Me·gong Festival-na tarisamsoenggipa biaprangko nianganio a·dokni Tourism Minister baksana Tourism Department-ni official-rang, Rongram Block-ni Block Development Officer (BDO), Traffic-ni SP aro dingtang dingtang department-ni official-rangba dongpaaha.
Ia chang Me·gong Festival-ko ong·atanio, British Boy Band ‘Blue’, Grammy Award-na nominate ka·ako man·gipa Julian Marley (Bob Marley-ni depante), mingsinggipa Richard Marx, Yellow Claw, Bollywood-na git ring·gipa Kanika Kapoor aro Neeti Mohan baksana a·dokni mingsinggipa dolrang, jekai Rough Road, Hoi Hoi Makbil, Haystack Ladies, G-Hills Finest, Crack Gang aro Ahaia-ba gitrangko ring·e mesokangna sienga.
Ia bilsini Me·gong Festival-ba tarisoenggipa biaprangko niangengon, kamrang matchotangengahani gimin Tourism Minister an·tangni chu·ongnikaniko parakangenba, ia festival-ona re·baenggipa manderangko name sokachakchina gita ia program-ko ong·atenggipa dolrangko didiangaha.
Ia Me·gong Festival-ona re·bagipa manderang, namnamgipa git ring·anirangko nikna cholko man·an baksana A·chikrangni cha·tobegipa bijak aro gipin cha·anirangko cha·e nina cholko man·ronga.
