TURA: Changbongagipa Me·gong Festival-ko re·baenggipa December-ni 5 aro 6 tarikrango, Jengjal Civil Sub-Division-ni ning·o donggipa Bolbokgre aro Wa·tregre songrango ong·atengani gimin, ia festival ba manianiko ong·atanio, re·ruraenggipa gari gorarang apchangket ong·atako man·jana gita West Garo Hills a·jani District Magistrate, dingtang dingtang niamrangko ra·gatangaha.
Ia salgnina ong·atenggipa Me·gong Festival-ni somoio ramarang apchangket ong·atako man·jana gita dal·dalgipa truck garirangko, December 5 tarik pring 6:00 bajioni December 7 tarik pring 6:00 bajiona kingking Selsella-oni Tura-ona re·rurana on·jawa aro iandakgipa garirang, Asanang bibraoni Williamnagar-ona dakanggipa gitcham rama gita re·ruraskana nanggen ine District Magistrate u·iataha. Nangchongmotana re·ruraenggipa garirang, jekai sagipa manderangko salruragipa garirang, nangchongmotgipa bosturangko salgipa garirang, fire brigade, police aro uandakgipa garirangnade maming champengani dongskajawa ineba District Magistrate u·iataha.
Ia salgnina ong·atenggipa Me·gong Festival-ni somoio, Selsella aro Tura jillani gisepo donggipa NH-51 ramao, December 5 tarik pring 6:00 bajioni December-ni 7 tarik pring 6:00 bajiona kingking NHIDCL aro PWD-ni pilak kamrangkon dontongchengna nanggen ineba u·iataha.
Indake ong·engon, ia salgnina ong·atenggipa Me·gong Festival-ni somoio, je a·a nokgiparangan, an·tangtangni bagan barirangko parking lot ba garirang donchakna gita on·engachim, Light Motor Vehicle (LMV)-rangoniko gong 100 aro two-wheeler ba chakka samgni donggipa garirangoniko gong 50 ka·e parking fee-ko ra·china gita District Magistrate u·iataha.
Garirangoniko nangana bate parking fee ra·aniko champengna aro Me·gong Festival-ni somoio gari gorarangni apchangket ong·aniko namatna miksonganio ia niamrangko District Magistrate ra·gate on·angaha.
