TURA: North Garo Hills a·jani Rongrong constituency-ni ning·o donggipa New Kantolguri songo Park University-ko kulina a·dok sorkarini tik ka·engani gimin Rongrong GHADC constituency-ni MDC Rinaldo K Sangma sing·doataha.
Iani bidingo a·dokni Chief Minister Conrad K Sangma-na u·iatchina gita North Garo Hills a·jani Deputy Commissioner-na sedoatengon, New Kantolguri songo donggipa biapara District Council-ni kachario judicial inquiry ong·engkua aro maikai ia biapo a·dok sorkari, Park University-ko kulina gita lekkarangko tarina man·aha ine Sangma sing·doataha.
“Jaipur a·dokni Gyansham Bhora Charitable Trust-chi New Kantolguri songni bigha 455 ong·gipa Tribal-rangni a·ao Park University-ko kulina a·dokni Cabinet, re·anggipa November 26 tariko ra·chakangaha ine anga koborrangoniko knasona man·aha. Ia biapni bidingo District Council-ni kacharion judicial inquiry ong·kuenga ong·ode maikai ia biapo Park University-ko kulina gita a·dok sorkari, proposal-rangko, file-rangko aro administrative note-rangko tarina man·aha,” ine Rongrong MDC sing·doataha.
Indian Constitution-ni Sixth Scheduled a·jarangode Autonomous District Council (ADC)-rangsa bilko man·a aro a·dok sorkaride skatang a·arangko kangna bil dongja ineba Sangma parakataha.
“Ia a·arangara GHADC-ni ning·o ga·akgipa biaprangsa ong·e Sixth Scheduled-ni ning·o chel·chakako man·gipa biaprangsa ong·ani gimin a·dok sorkaride a·arangko kangna bil dongja aro GHADC-ni kosako re·badena man·ja. Uni gimin Maharirangni permission gri aro GHADC-ni ra·chakani gride ia biapko a·dok sorkari kangdrana bil dongja,” ine Sangma parakataha.
Sixth Scheduled a·jarango a·dok sorkari aro district administration-ni District Council-ko re·badena jotton ka·aniara GHADC-na on·gimin bilko pe·ani gita ong·enga ineba Sangma parakataha.
Indake ong·engon, New Kantolguri reserve land-ni bidingo judicial inquiry-ko matchotkujaskal, ia biapo Park University kulina ja·ku de·anirangko aro pilak kamrangkon dontongkuchina gita Rongrong MDC, a·dok sorkariko didiataha.
