TURA: Garo Hills Autonomous District Council (GHADC)-o tangka jakkalsretani bidingo Enforcement Directorate (ED) Shillong Sub-Zone, mijal Bristibaro Tura songjinmani dambonga biaprangoniko am·sandina a·bachengata.
Official-rangoni u·iatani gitade tangka jakalsretanina matnangako man·gipa manderangara, Boston Ch Marak, Ismail Marak, Kubon Sangma aro Nikseng Sangma ong·a. ED ni am·sandina a·bachengataniara, re·anggimin 2015-16 bilsini somaio Tribal a·jarangko namroro-silroroatna Special Assistance Grants, GHADC-na chu·gimik 28.66 crore tangkarangko chamatahachim, unoni 1 crore de Asanang Constituency-na namroro-silroroatani kamrangna ong·achim ine parakataha.
Chamatgimin tangkarangoniko 60 percent-kode dakna nangchongmotgipa kamrangko dakgijaan contractor Kubon Sangma aro Nikseng Sangma-mangna on·samsoaha. Esmail Marak, contractor Kubon Sangma-na lak 19.8 cheque-ko on·a aro Nikseng Sangma-na lak 25.5 cheque on·aha. Uandake tangka paisarangko okani ja·mano Kubon Sangma chu·gimik tangkarangkon matnangako man·gipa Esmail Maraknan on·aha, apsan dake Nikseng Sangma-ba chu·gimik tangkarangkon Esmail Marak-ni jikgipa Pratibha Marak-ni Bank Account-ona watatskaha ine u·iataha.
