SHILLONG: Meghalaya Public Service Commission (MPSC) examination system-ni reforms ba niamrangko nipiltaichina mol·molaniko sorkarini ra·chakani gimin Bharatiya Janata Party (BJP) Meghalaya unit, namnike kusi ong·ako parakangaha.
BJP-ni agan-ku·pattianiarangko sorkari aro Chief Minister Conrad K. Sangma-ni knachakani gimin party, kusi ong·a ine BJP Meghalaya chief spokesperson ba koborna ku·wattimgipa Mariahom Kharkrang, aganaha.
BJP, MPSC-ni format-ko Union Public Service Commission (UPSC)-ni format gitan ja·rikchina agan-ku·pattiaha, mongsongbate graduation-ni final year-o ong·gipa candidate-rang-ni eligibility-o dongimin niamrangko ja·rikna aganaha.
UPSC, final year-o ong·gipa candidate-rangko preliminary examination-o asongna on·a indiba uamang graduation-ni certificate-ko mains-na skang on·na nangskaa. MPSC-de application galani gadangon degree-ko am·a, jeni a·sel candidate-rang bilsisako indin gimaatna nangao ga·aka.
Unbaksana MPSC-o fixed examinatioin schedule dongjani gimin janapaha. UPSC-ode annual cycle ba bilsio changprak porikkako ong·atani tik somoirang donga. MPSC-ni porikkarangko vacancy-rang nakataosa seata, uni gimin candidate-rang somoiko nichake dongna nanga.
BJP-ni a·gipi dilgiparang gitcham civil servant-ba ia mamlako nirokatchina janapaha. State BJP president Rikman G. Momin, ia mamlani bidingo Chief Minister-na chittiko sedoaha. Iana sorkari, mamlako nirokatna aganchakaha.
