CAG report-rango pangchakesa a·dok gro-jinang nangna sienga ine agana: Pala

SHILLONG: Meghalaya sorkarini tangka paisa ra·sroani bidingo a·dokni Chief Minister Conrad K Sangma-ni talataniko on·angani ja·man, GAC-ni report-rango aro a·dokni budget-rango pangchakesa a·dokko gro-jinang nangna sienga ine aganaha ine Sukrobar salo, Meghalaya Pradesh Congress Committee (MPCC)-ni president Vincent H Pala aganchakaniko on·angskaaha.
Pala-ni aganani gitade, a·dok sorkarini iandake skatang tangka ra·sroanirangko jinmana parakna skangba Congress dol, name am·sandichengaha aro tangka paisarangko nangana bate ra·sroaniara a·dokni manderangnan bojako ra·banasiani gita ong·enga.
Batanggimin bilsirango a·dok sorkarini grorang 60 percent-ona tang·doange, da·o gimik kror 25,000 ong·engaha aro ian a·dokni mande sakprako gong 76,000 ka·e bojako ra·baani gita ong·enga ineba Pala aganaha.
“A·dok gro-jinang nangnasiengaha maina a·doko man·enggipa gong kror 4225 kajinarangoni gong kror 1000 sud aro gong kror 2500 principal-ko man·chape bilsiprakon gong kror 3500-ni sudko gamna nangengaha,” ine MPCC president aganaha.
Sorkarini dormaharangna GSDP-oni 7.9 percent baksana dingtang dingtang korosrangko ka·ani ja·man, a·dokni nangchongmotgipa kamrang, jekai lekka pora, an·seng baljokani aro kamrangko nakataninade kajinarangoni 2.6 percent-san dongaiaha ineba ua aganaha.
Sorkariko chalaisreta aro tangka jakkalsreta ine matnangatengon, a·dok sorkarini indita kajinarangko man·ani aro tangka paisarangko ra·sroanichi manderangde maming namgnirangkon man·jaenga ine Pala parakataha.
Pala-ni aganani gitade, NPP-chi dilenggipa MDA sorkari, sak 12 MLA-rangni constituency-rangnasan mikpakma nie namroro silroroaniko on·enga indiba dam 48 gipin constituency-rangkode nichanggalenga.
A·dok sorkarini ra·srogipa tangka paisarangoni 72 percent-kode ma·mong sorkarisa gamgen aro 28 percent-kosan a·dok sorkaride gamna nangaigen ine a·dokni Chief Minister Conrad K Sangma-ni aganchakaniko on·ahani gimin ia kattarangko MPCC-ni president aganskaaha.
Meghalaya a·dokni tangka ra·sroani GSDP-oni 40 percent gapenga ine Congress dolni matnanganina aganchakaniko on·angengon, darang a·dokan dongimin niamna bate tangka paisarangko ra·srona man·jana gita India sorkari, Finance Ministry aro Reserve Bank of India-o dongimin niamrang donga ine Chief Minister parakatahachim.
“Chingni tangka paisa ra·sroaniara dongimin niam gita ong·aienga,” ine Sangma aganenba, Meghalaya a·dokni dal·roroanina jakkalenggipa tangka paisarangoni 70 percent-de a·dokni internal revenue-onin re·baenga ine parakataha.
ADB aro World Bank-ni loan-rangde 80:20 ratio-osa ong·a ine janapatskaengon, ia loan-rangoni 20 percent-kosan Meghalaya a·dokde gamna nangaigen ine Chief Minister talataniko on·angaha.
“80 percent loan-oni 90 percent-de ma·mong sorkarini on·enggipasa ong·a aro Meghalaya sorkaride 10 percent-kosan gampilna nangaia. Chu·gimik hisapko niatgenchimode, 72 percent-ko ma·mong sorkari gamenga aro 28 percent-kosan a·dok sorkaride gamna nangaia,” ine Sangma aganaha.
Manderangko dilsretna jotton ka·enga ine Meghalaya Congress-ni president Vincent Pala-ko matnangatengon, a·dokni dal·roroaniko amchakpajaesa Congress dol, manderangko dilsretna jotton ka·skaenga ine Sangma parakataha.