Dormaharangko ta·raken on·china AHAM, CM-ko didiata
TURA: Social Welfare Department-ni Integrated Child Development Services (ICDS) Poshan Abhiyan-o kam ka·enggipa manderang, re·anggipa September jaonin an·tangtangni man·na nangenggipa dormaharangko man·kujaengani a·sel neng·nikanirangko chagrongna nangtokenga ine A·chik Holistic Awakening Movement (AHAM) parakatenba, ia dormaharangko ta·raken on·atchina a·dokni Chief Minister-ko seachi didiataha.
AHAM-ni president Georgeprince Ch Momin-ni parakatani gitade, jabrini dormaharangko man·kujaengani gimin ICDS Poshan Abhiyan-o kam ka·enggipa manderangni badi ka·aniko man·soani ja·man ua iani bidingo a·dokni Chief Minister-na sedoataha.
“Meghalaya a·dokni pilak biaprangon ICDS Poshan Abhiyan-o kam ka·enggipa coordinator-rang, re·anggipa September jaonin dormaharangko man·tokkujaengani a·sel, an·tangtangni nokdangko chalaianio neng·nikanirangko chagrongna nangtokenga ine chingna badi ka·doataha. Dormaharangko man·jaengani a·selan kam ka·enggipa manderang, tangka paisarangko ra·sroesa, dedrangni skul fee, cha·ani ringani aro dingtang dingtang kamrangna jakkalna nangenga,” ine Momin parakataha.
Indian Constitution-ni Article 21 ning·o mandena on·gimin bilrangni gimin janapatengon, indita jarangni dormaharangko on·chipgija donaniara mandena on·gimin bilko pe·ani gita ong·a ine Momin parakataha.
ICDS Poshan Abhiyan-o kam ka·enggipa manderangna ia jabrini dormahako ta·raken on·na gita Social Welfare Department-na ge·etaniko on·china Chief Minister-ko didiatengon, “ICDS Poshan Abhiyan-o kam ka·enggipa manderang, dingtang dingtang biaprango, mongsongbate songadam nokadamrango ma·giparangna aro bi·sarangna an·seng baljokaniko on·na gita an·tangtangko on·kange kamko ka·engani gimin dormaharangko somoi gita on·na nangchongmota,” ine AHAM-ni president parakataha.
