TURA: Sukrobar salo, South Garo Hills Krishi Vigyan Kendra (KVK)-ni gita World Soil Day-ko Dagal Gopgre-o donggipa KVK Training Hall-o manidilangaha.
Ia tom·aniko SGH KVK-ni SMS (Plant Protection) Dr Tanya R Marak dilangaha aro tom·anio, SGH KVK-ni Head aro Principal Scientist Dr Athokpam Haribhushan, rimchaksoani kattarangko aganangskaaha.
Tom·aniona sokbagiparangna rimchaksoani kattarangko aganangengon, pangkamgipa gama ge·anirangko dakna gita Soil Health ba a·salrangko name rakkina nangani gimin agan-talatanirangko on·angaha.
Ia program-ko ong·atanio, KVK-ni Program Assistant (Lab Technician) Dr Amarjit Karam-ba jinmana aganprakengon, a·salrangko an·seng baljokgipa ong·e rakkina nangani gimin aganangenba, a·salrangko chimongani bidingo game ge·e cha·giparangna dake mesokangaha.
Ia program-ko ong·atanio, gimik dam 11 songrangoni sak 110 game ge·e cha·giparang bak ra·angaha aro ia program-o game ge·e cha·giparangna dingtang dingtang me·su bitchilrangkoba suale on·angaha.
Ia program-ko ong·atanio West Garo Hills a·jani District Local Research Station & Laboratories-ni on·gipa Soil Health Card-rangkoba bak ra·gipa manderangna sualataha.
Bon·kamao, SGH KVK-ni SMS (Fisheries) Thongam Monika Devi, mittelpilani kattarangko agane, ia tom·aniko matchotataha.
